ЯҢАЛЫКЛАР

Бүген хакимият бинасының кече залында район икътисадый советының чираттагы утырышы узды. «БлагоСтрой» ҖЧҖнең 2018 елдагы эшчәнлеге нәтиҗәләре һәм 2019 елга перспектив планнар белән катнашучыларны җаваплылыгы чикләнгән җәмгыять директоры Р. Р. Зәйнуллин таныштырды.

Югары, район һәм шәһәр судлары командаларының традицион ярышлары җиденче тапкыр һәм беренче мәртәбә Зәй районында уза. Узган елларда беренчелек Яшел Үзән районында үткәрелде.

28 февральдә Зәй муниципаль районында социаль – тискәре күренешләрне, хокук бозуларны кисәтү, наркотиклар куллануны булдырмау, сәламәт яшәү рәвешен формалаштыру, яшүсмерләр арасында хокукый белемнәрне пропагандалау атналыгы кысаларында, Зәй муниципаль районының 7 нче урта гомуми белем бирү мәктәбенең актлар залында, районының Әтиләр советы катнашында ата-аналар конференциясе узды.

Зәй муниципаль районында 50 нче бала тууы теркәлде. Ул 2019 нче елның 23 февралендә туган Компаниец Анастасия Владимир кызы. Анастасия әтисе Владимир Сергей улының һәм әнисе Екатерина Сергей кызының икенче баласы.

"Гаилә абонементы» программасы кысаларында, һәр айның соңгы пәнҗешәмбесендә музейда гаилә ялы көне үткәрелә. 28 февральдә музейда җанлы экспозиция вакытында балалар сәнгать мәктәбе педагоглары һәм тәрбияләнүчеләре чыгышы булды. Концерт залында Сәйдәшев, Бетховен, Косенко, Беркович әсәрләре яңгырады.

Чираттагы «Гаилә дәресе» 2019 нче елның 28 февралендә Зәй районының ГХАТ бүлегендә үтте. Баш белгеч Гөлнар Гыйзәтуллина “Гаилә – бүген һәм иртәгә” дигән темага дәрес үткәрде.

Юлия Белорусова, Анастасия Седова, Анна Нечаевская һәм Наталья Непряева составындагы Россия хатын-кызлар җыелма командасы Зеефельде (Австрия) узган дөнья чемпионатының  эстафета ярышларында бронза яулады. Алтынны шведлар отты. Көмешне норвегиялеләр алды. Россия җыелма командасы өчен бу-быелгы дөнья чемпионатында алтынчы медаль. Иртәгә, 1 мартта, Зеефельдта ир-атлар арасында эстафета ярышлары узачак.

Бүген халык мәшгульлеге үзәге юлламасы буенча беренче төркем эшсезләр укуга кереште. Яңа белемне алар “Электр җиһазларны ремонтлау һәм хезмәт күрсәтү буенча электромонтер” юнәлеше буенча алачак. Төркемдә ун кеше. Һәркайсының эшсез калу сәбәбе төрле. Кемдер предприятиедә хезмәткәрләрне кыскарту аркасында эшсез калган, берничә кеше заводта сезонлы эшләр тәмамланып, хезмәт килешүе вакыты чыкканга мәшгульлек үзәгенә мөрәҗәгать итә. Биредә аларга һөнәри белем алырга яки профессиональ әзерлеген арттырырга тәкъдим итәләр. Электромонтер һөнәренә зәйлеләр өч ай укыячак. Уку дәверендә аларга стипендия түләнәчәк һәм матди ярдәм күрсәтеләчәк. Курс тәмамлангач, таныклык тапшырылачак. Эшсез гражданнарның һөнәри әзерлеге, квалификациясен арттыру Зәй районы мәшгульлек хезмәте өчен өстенлекле юнәлеш булып тора. Ел дәвамында үзәк тагын “Электр газ эретеп ябыштыручы”, “Маникюр ясаучы”, “Пешекче”, “1С операторы: бухгалтерия” программалары буенча укыту оештырачак. Декрет ялында булган хатын-кызлар смета эшенә өйрәнә алачак.

28 февральдә Зәй шәһәрендә Россия Федерациясе Федераль Җыены Дәүләт Думасы депутаты Ольга Павлова, Татарстан Республикасы прокурорының өлкән ярдәмчесе Ирина Петрова һәм Зәй муниципаль районы башлыгы урынбасары Валерий Акатьев катнашында гражданнарны кабул итте. Шәһәр һәм район халкы "Ишегалды тренеры" проектын тормышка ашыруда ярдәм күрсәтү, спорт сәламәтләндерү үзәгенә хоккей мәйданчыгы өчен ясалма катлам бүлеп бирү һәм торак-коммуналь хуҗалык мәсьәләләре белән мөрәҗәгать итте. Барлык сораулар һәм тәкъдимнәр контрольгә алынды, аларның һәркайсы буенча тиешле чаралар һәм карарлар кабул ителәчәк.

27 февральда шәһәребезнең С.Рәфыйков исемендәге Үзәк китапханәсендә районыбызда игълан ителгән Мәдәният елын тантаналы ачу булды. Әлеге чарага китап сөючеләр, китапханәнең тугры дуслары чакырулы иде.