ЯҢАЛЫКЛАР
Дүрт-Мунча җирлегендә гыйбадәтханәләр саны артуга бара. Моннан биш ел элек Дүрт-Мунча-да мәчет сафка баскан иде. Узган шимбәдә исә Кабан-Бастрыкта күптән көтелгән чиркәү ачылды. Аны ачу тантанасына күрше-тирә район-шәһәр, авыллардан биниһая күп халык җыелды.
Районда урак темплары көннән-көн арта бара. Соңгы мәгълүматлар буенча, бөртеклеләр барлыгы 2851 гектарда җыеп алынды. Уңыш гектарыннан уртача 18,3 центнер тәшкил итә. Бу әле көзге культуралардан.
Югары Пәнәче мәктәбе укытучысы Николай Карташов 56 яше тулгач, икенче югары белем алу өчен, Алабуга педагогика университетына укырга керде. Аның беренче югары белеме авыл хуҗалыгы өлкәсе буенча. "Яшь" студентның педагогика өлкәсендә тырышып белем алачагына шик юк.
ЗАГСта бер ай инде бушлай юридик ярдәм итү буенча бердәм кабул итү көне күрсәтелә. Атнаның һәр пәнҗешәмбесендә теләгән кеше гражданлык хәле актлары -электрон гариза бирү, язылышу вакытын броньлау, аерылышу һ.б.лар буенча консультация ала ала. Бер ай эчендә бүлеккә ике дистәдән артык кеше мөрәҗәгать иткән.
Районыбызның кече авыллары матур табигать кочагына урнашулары, туган туфрагына чын күңелдән береккән кешеләре белән аерылып тора. Ямьле җәйге көннәрдә үткәрелүче Кече авыл бәйрәмнәре мөхтәрәм райондашларыбызны хөрмәтләү, аларның туган җирләрен кадерләп яшәүләренә мәдхия уку, яшьләребез күңелендә кече Ватаныбызга мәхәббәт тәрбияләү максатын күздә тота.