ЯҢАЛЫКЛАР

25 нче июнь аппарат киңәшмәсе Никифоров урамы, 71нче йортта булган шартлау нәтиҗәсендә гомерләре өзелгәннәр истәлегенә бер минутлык тынлыктан башланды. Район башлыгы Разиф Кәримов киңәшмәдә катнашучыларны шәһәрдә килеп туган гадәттән тыш хәл турында белешмә белән таныштырды.

Районыбызның шәһәр һәм авыл мәктәпләрендә чыгарылыш кичәләре үтә. Мәктәптә 11 ел дәвамында белем алу, бердәм дәүләт имтиханнарын тапшыру барысы да артта калды. Быел район буенча 178 укучыга тантаналы төстә урта белем турында аттестат тапшырылачак. Бүген Р.Ш.Фәрдиев исемендәге ял паркында кичке 17.00 сәгатьтә алар өчен “Йолдызлы кичә” оештырыла.

Районыбызның 3 ветераны үзләренең 90 яшьлек юбилейларын билгеләп үттеләр. Алар Сәрәпәле авылында яшәүче Степанова Анна Ивановна, Зичәбаш авылында яшәүче Антонов Ксенофонт Константинович һәм Иске Зәй бистәсендә яшәүче Симонова Анна Кузьминична. Юбилярларны гомер бәйрәмнәре белән район башлыгы урынбасары В.Г. Акатьев, авыл җирлеге башлыклары котлады. Ветераннарга Россия Президенты В.В. Путин исеменнән котлау открыткасы, район башлыгы Р.Г. Кәримов исеменнән истәлекле бүләкләр тапшырылды. Автоклуб хезмәткәрләре алар өчен күңелле концерт программасы әзерләгәннәр иде.

23 нче июньдә Р.Ш. Фәрдиев исемендәге ял паркында кул көрәше буенча ярышлар узды. Хатын-кызлар арасында 60 кг.га кадәрге авырлык үлчәвендә 1 урынга- Вәлиева Алсу, 2 урынга-Морданова Рузалия, 3 урынга Маврина Наталья, 60 кг. нан артыграк авырлык үлчәвендә 1 урынга- Дубинина Анастасия , 2 нче урынга Терентьева Елена, 3 нче урынга Мусина Люба лаек булды.

Бүген халкыбызның милли бәйрәме Сабантуйны бәйрәм иткәндә ил азатлыгы өчен көрәштә катнашкан сугыш ветераннары аерым игътибар үзәгендә булды. Зәйдә яшәүче 5 ветеранга “Фидакарь хезмәте өчен” медальләре тапшырылды.

Зәй Сабантуе традицион төстә быел да шәһәр ипподромында ат чабышлары белән башланып китте. Берничә төркемдә үткәрелгән узышларда 44 чабышкы катнашты. Районыбыз чабышкылары белән көч сынашырга Актаныш, Алексеевский һәм республиканың башка районнарыннан килүчеләр бар иде.

Хөрмәтле зәйлеләр һәм шәһәр-районыбыз кунаклары! Сезне ихлас күңелдән язгы кыр эшләре тәмамлануны гәүдәләндергән милли бәйрәмебез Сабантуй белән котлыйм.

Өч яшькә кадәр бала белән декрет ялында утыручы 10 әни яңа белемнәр, күнекмәләр алу һәм булган белемнәрне яңарту максатында 21 июньнән укуга кереште. Укулар Зәй мәшгульлек үзәге тарафынннан «1С: Предприятие» программасы буенча оештырыла.

Зәй мәшгульлек үзәге белгечләре “Шатлык” халыкка социаль хезмәтләр күрсәтү үзәге белгечләре белән бергә хезмәткә яраклы яшьтәге гражданнарны һәм балигъ булмаган 14-18 яшьлек гражданнарны эшкә урнаштыруда ярдәм итү максатыннан социаль яктан имин булмаган гаиләләрдә булдылар.

Елдан - ел оештыручылар бәйрәм программасын яңартырга, тамашачы өчен кызыклырак итәргә тырышалар. Быел да Сабантуй кунаклары күп төрле кызыклы уен- бәйгеләр, спорт ярышларында катнашып, җитезлек- елгырлыкларын, осталыкларын күрсәтә ала. Зәйлеләр һәм шәһәр- районыбыз кунаклары игътибарына татар эстрадасы җырчылары катнашында бай концерт программасы тәкъдим ителәчәк. Көрәшчеләребез, гер күтәрүчеләр иң яхшы техник алымнар күрсәтергә әзерләнә. Сабантуй, гадәттәгечә, шәһәр ипподромында ат чабышларыннан башланып китәчәк. Аннан соң бәйрәм чаралары Р.Фәрдиев исемендәге паркка күчә.