Район башлыгы Разиф Кәримов аппарат киңәшмәсе үткәрде

25 нче июнь аппарат киңәшмәсе Никифоров урамы, 71нче йортта булган шартлау нәтиҗәсендә гомерләре өзелгәннәр истәлегенә бер минутлык тынлыктан башланды. Район башлыгы Разиф Кәримов киңәшмәдә катнашучыларны шәһәрдә килеп туган гадәттән тыш хәл турында белешмә белән таныштырды. Шартлау вакытында зыян күргән 10 кешенең икесе вафат, 2 кеше республика клиник хастаханәсендә, 4 кеше район үзәк дәваханәсенең терапия бүлегендә ята (аларның хәле тотрыклы), 2 кеше фаҗига булган көнне табиб караганнан соң кайтарып җибәрелгән.Барлык хезмәтләр авария нәтиҗәләрен юкка чыгаруга җәлеп ителгән, зыян күрүчеләргә тиешле ярдәм чаралары күрсәтелә. Йортның 8нче подъезды тирәсе әйләндереп алынган, подряд оешмасы билгеләнгән, җимерелгән фатирларны сүтү эше башланачак. Подъездда яшәүчеләрнең берсе вакытлыча «Яшьлек» боз сараена урнаштырылган, калганнары- туганнары, дусларында яшәп торырга карар кылганнар. 1-7 подъездларда барлык коммуникацияләр тоташтырылган, аларда яшәүчеләрнең тормышына куркыныч янамый. Татарстан Республикасы Президенты Рөстәм Миңнеханов Татарстан Хөкүмәтенә шартлау нәтиҗәсендә зыян күргәннәргә матди ярдәм күрсәтү турында күрсәтмә бирде. Вафат булучыларның туганнарына Татарстан бюджетыннан 1млн.сум, зыян күрүчеләргә – сәламәтлекләренә килгән зыянга карап акчалата ярдәм күрсәтеләчәк. Аппарат киңәшмәсендә шулай ук райондагы оператив хәл һәм авыл хуҗалыгындагы эшләрнең барышы каралды.