Район башлыгы Разиф Кәримов зәйлеләрне Сабантуй белән котлый

Хөрмәтле зәйлеләр һәм шәһәр-районыбыз кунаклары! Сезне ихлас күңелдән язгы кыр эшләре тәмамлануны гәүдәләндергән милли бәйрәмебез Сабантуй белән котлыйм. Ерак гасырларда яралып, буыннардан-буыннарга күчеп, үзенең асылын югалтмыйча, безнең көннәргә килеп җиткән һәм милләтебезнең горурлыгына әйләнгән Сабантуе халкыбызның хезмәтне ярату, җиңүгә омтылыш, мәрхәмәтлелек, туган телгә һәм мәдәнияткә мәхәббәт кебек иң яхшы сыйфатларны үзенә туплаган. Сабантуе, исеменнән үк күренгәнчә, язгы кыр эшләре тәмәмлангач та, киләсе уңышка мәдхия буларак уздырыла. Район игенчеләре яңа заманча технологияләрне гамәлгә кертеп, үсемлекчелек һәм җирне эшкәртүдә фәнни якын килеп, елдан-ел авыл хуҗалыгы продукциясе җитештерү күләмен арттыра бара. Агымдагы елда да югары уңыш алырга төпле нигез бар. Хуҗалыкларда җитәкчеләр һәм белгечләрнең эшне оештыра белүе, механизаторларыбызның намуслы хезмәте язгы кыр эшләрен оптималь кыска срокларда башкару мөмкинлеге бирде. Быел чәчүлек мәйданнары 72 мең гектар тәшкил итә. Язгы культуралар - 49 мең, шикәр чөгендере 9 мең гектар мәйданда игелде. Табигать тә безгә хәер-хаклы: шифалы яңгырлар явып, игеннәр яшел хәтфкебек утыра, районыбыз игенчеләре җылы көннәр килүен түземсезлек белән көтәләр. Хөрмәтле зәйлеләр! Үзенең көндәлек хезмәте белән районыбыз, республикабызның социаль-икътисади үсешенә өлеш керткән һәркемгә рәхмәт белдерәм. Авыл хезмәтчәннәренең туган җирне яратып, аңа бирелеп, район иминлеген кайгыртулары чиксез хөрмәткә лаек. Чын йөрәктән барыгызга да ныклы сәламәтлек, аяз күк йөзе, кырларда мул уңыш, табыннарыбызның муллыгын, иминлек һәм күңел тынычлыгы телим. Бу бәйрәм сезгә онытылмас һәм якты мизгелләр бүләк итсен.