ЯҢАЛЫКЛАР

Хөрмәтле зәйлеләр һәм шәһәр-районыбыз кунаклары! Сезне чын йөрәктән Татарстан Республикасы һәм Шәһәр көне белән котлыйм. Республика көне - күпмилләтле Татарстан халкының тынычлык һәм иминлек, бердәмлек символы бәйрәме ул. Без төбәгебезнең байлыгы, аның бай тарихы белән хаклы рәвештә горурланабыз һәм шушы уңышларга ирешергә мөмкинлек биргән өлкән буын, аларның хезмәте, батырлыгы алдында баш иябез. Безнең республиканы Россиядән чит төбәкләрдә дә яхшы беләләр. Ул халыкара хезмәттәшлек дәрәҗәсендәге чит ил инвестицияләрен үзенә җәлеп итә. Күптән түгел республикабыз башкаласында футбол буенча үткәрелгән Дөнья чемпионаты халыкара масштабта иҗтимагый-сәяси вакыйга буларак тарихка кереп калды. Республика һәм районыбызда яшәүчеләр дә әлеге мөһим вакыйгада катнаштылар. Футбол буенча Дөнья чемпионаты тагын бер мәртәбә Татарстан халкының бердәм һәм туган республикабыз хакына теләсә нинди мәсьәләләрне чишәргә әзер булуын күрсәтте. Без туган Татарстаныбызда, республикабызның иң төзек шәһәрендә яшәвебез һәм хезмәт куюыбыз белән хаклы рәвештә горурланабыз. Районыбызда федераль һәм республика программалары уңышлы тормышка ашырыла. Алар нигезендә шәһәр-районда клублар төзелә, сәламәтлек саклау учреждениеләре, белем бирү учреждениеләре һәм күпфатирлы йортлар ремонтлана, юллар, тротуарлар салына. Урып җыю эшләре төгәлләнүгә бара. Район игенчеләре бөртекле культуралардан һәм шикәр чөгендереннән яхшы уңыш үстерделәр. Бу уңышларда сезнең һәркайсыгызның да өлеше бар. Хөрмәтле зәйлеләр, сезгә фидакарь хезмәтегез өчен рәхмәт белдереп, чын күңелемнән ныклы сәламәтлек, киләсе көннәргә ышаныч, туган шәһәребез һәм Татарстаныбыз хакына нәтиҗәле хезмәтегездә уңышлар, бәхет һәм иминлек телим. Разиф Кәримов, муниципаль район башлыгы.

Бүген Татарстан Президенты Рөстәм Миңнеханов Республика көне уңаеннан муниципаль районнар арасындагы республика смотр-бәйгесендә җиңүчеләргә машина ачкычлары тапшырды, дип хәбәр итә “Татар-информ” агентлыгы. Муниципаль районнарга бирелгән 93 автомобильнең икесе Зәй районына кайта. Бүген Президент кулыннан машина ачкычларын тантаналы төстә Аксар һәм Сәвәләй авыл җирлекләре башлыклары алды. Бәйгегә барысы 200дән артык гариза кергән булган, шулар арасында зәйлеләрнең дә җиңү яулавы, машиналы булуы куанычлы.

Хөрмәтле зәйлеләр һәм шәһәр-районыбыз кунаклары! Сезне 30 августта Шәһәр көненә багышланган бәйрәмгә чакырабыз! Программада: Ринат Фәрдиев исемендәге паркта балалар мәйданчыгы 13.00-16.00-балалар өчен күңел ачу чарасы “Энергия” стадионы 14.00-16.00 – мини футбол буенча турнир, стритбол ярышлары Ипподром 15.00 – район башлыгы кубогына картинг ярышлары Ринат Фәрдиев исемендәге паркта спорт мәйданчыгы 16.00-19.00 –балалар-яшүсмерләр мәктәпләрендә алып барылучы спорт төрләрен презентацияләү: стендлар, кубоклар күргәзмәләре, күрсәтмә чыгышлар, “Спортлы Зәй” фитнес-тренировкасы, черлидинг буенча мастер-класс, эстафета ярышлары ФОК каршындагы мәйдан 16.00-18.00 – бәйрәм концерты, мастер-класслар, “Шах һәм мат” уен программасы Казначылык бинасы каршындагы мәйданчык 17.00-19.00 – “Турнир юнәлеше” урта гасырлар сугышы буенча шоу Ефимов урамындагы мәйданчык 17.00-19.00 - «Мәдәниятле SDVIG» сәнгать бульвары Ринат Фәрдиев исемендәге парк 16.00-19.00 – “Һөнәрләр шәһәре” кидспейсы 17.00-19.00 – “Утырып... укыйк” әдәби кафесы 17.30 – 18.30 - “Мәрхәмәтлелек, мәхәббәт һәм бәхет причалы” гаилә бәйрәме Ринат Фәрдиев исемендәге паркта төп сәхнә 17.00-18.00 “СССРга кайту” ретро программасы. “Визит” вокаль-инструменталь ансамбле һәм шәһәр үзешчәннәре чыгышы 18.00-18.05- “Безнең шәһәр” видеоролигы 18.05-18.25 – бәйрәмне тантаналы төстә ачу, “Мин – Россия гражданины” паспортлар һәм “Хезмәт кешесе” премияләрен тапшыру 18.25-18.35 – “Биюче рәссам” Алинә Хәйруллина чыгышы 18.35-20.00 – шәһәр артистлары чыгышы 20.00-21.00 – татар эстрадасы артистлары җырлый 21.00-22.00 - рус эстрадасы “йолдызлары” чыгышы 22.00 – бәйрәм салюты

Яңа уку елы башланырга санаулы гына көннәр калды. Әлеге тема Зәй районы башкарма комитеты каршындагы юл хәрәкәте куркынычсызлыгын тәэмин итү комиссиясе утырышында да төп мәсьәлә булды.  Юл хәрәкәте куркынычсызлыгы һәрвакыт мөһим, әмма балаларыбызны юл афәтләреннән саклау икеләтә-өчләтә игътибар сорый. Һәр мәктәп автобусы маршруты тиешле таләпләрне үтәп йөрергә, һәр мәктәптә балаларга юл кагыйдәләрен җитди аңлату эшләре алып барылырга тиеш. Җәйге каникуллардан соң аларга юл йөрү тәртибен даими искәртеп тору кирәк, бу педагогларга да, әти-әниләргә дә кагыла. Укуларның беренче көнендә-3 сентябрьдә һәр мәктәптә линейкалар ясап, аларда ЮХИДИ инспекторларының катнашуы кирәк, - диде комиссия рәисе, район башкарма комитеты җитәкчесе Илнар Хафизов. Башкарма комитет җитәкчесе кагыйдә бозган һәр мәктәп баласы белән аерым сөйләшү мөһимлеген дә ассызыклады. Районда 20 августтан 9 сентябрьгә кадәр “Игътибар, балалар!” айлыгы бара. Бу арада ЮХИДИ инспекторлары балалар учреждениеләре тирәсендә көчәйтелгән режимда эшли. Ә мәктәп автобусларына килгәндә, районда алар - 18. Һәр автобусның төзеклеге, педагоглар тарафыннан озатылып йөрелүе турында да мәгълүмат бирелде. Комиссия утырышында юлларны төзекләндерелү торышы да  тикшерелде.

28 августа Зәй политехник колледж ашханәсендә районкүләм Корбан аш узды. Анда 200 ләп зәйле килде. Район башлыгы Р.Г. Кәримов чарада катнашучыларны бәйрәм белән котлады, район күләмендә башкарылучы чаралар, авыл хуҗалыгы өлкәсендәге эш нәтиҗәләре белән таныштырды. Зәй мөселманнары бу көнне сый-нигъмәттән авыз итеп, вәгазь тыңлап, дога кылып, үзара хәл-әхвәл сорашып, тагын бер кат күңелләрен сафландырдылар. Имам-мөхтәсиб Фатих хәзрәт Нуруллин белдерүенчә, мондый Корбан ашлары районыбыз һәм шәһәребезнең башка мәчетләрендә дә уздырылды.

Хөрмәтле зәйлеләр! 4 сентябрь көнне Зәй муниципаль районы хакимиятенең 59 нчы бүлмәсендә балаларга алиментлар түләү мәсьәләләре буенча халыкны бердәм кабул итү була. Алдан язылу өчен телефон:3-41-10

Бүген Казанда Татарстан Президенты Рөстәм Миңнеханов үзенең тормыш иптәше белән берлектә республика өчен нәтиҗәле хезмәт куеп, аерым хөрмәткә лаек булган, үрнәк балалар үстерүче гаиләләр белән очраша. Бу күркәм чара Республика көне алдыннан традицион төстә оештырылып, гаилә кыйммәтләре мөһимлеген ассызыклый, хезмәтләре белән үрнәк татарстанлыларны хөрмәтләүне чагылдыра. Безнең Зәй районыннан Президент кабул итүләренә күп балалы Лопатиннар гаиләсе бара. Ә аңа кадәр җиде балалы Лопатиннар район башлыгы Разиф Кәримов белән очрашты. Район башлыгы аларны борчыган проблемалар турында да сорашты, теләк-ниятләрен дә белеште, күпбалалы гаилә өчен районда тудырылган чаралар турында да мәгълүмат бирде. Район башлыгы Разиф Кәримов Лопатиннар гаиләсенә иң изге теләкләрен белдерде, алар кебек гаиләләрнең күп булуын теләде. Өч ул, дүрт кыз үстерүче Ирина һәм Александр Лопатиннар - Зәйдә һәрьяктан үрнәк булулары белән билгеле кешеләр.

«Энергетик» Мәдәният сарае спорт залында “Сәламәтлек” спартакиадасы кысаларында авыл җирлекләре арасында өстәл теннисы буенча ярышлар үтте. Аларда 10 команда катнашты. Ярыш нәтиҗәләре буенча хатын-кызлар арасында Анна Муханова (Баграж авыл җирлеге) – I, Аделина Рябова (Сәвәләй)- II, Эльмира Якушонок (Якты Күл) III урында. Ир-атлар арасында Сергей Быля (Яңа Спас) – беренче, Михаил Сапаев (Поручик) – икенче, Александр Мартынычев – өченче. Командалар арасында Баграж җирлегенә тиңнәр юк, Яңа Спас белән Поручик икенче белән өченче урыннарны бүлеште.

Чаллыда чаңгы-роллер һәм кросс буенча ачык чемпионат һәм беренчелек узды. Анда Зәйнең Федор Симашев исемендәге спорт мәктәбеннән 25 спортчы катнашты. Чаңгы-роллерларда ярышучылар арасында үз яшь категорияләрендә безнең Софья Козенкова – I, Татьяна Емекеева - II, Валерия Крайнова, Илназ Ишмөхәммәтов III урында.

Бүген Зәй районы агрофирмалары хезмәтчәннәре шикәр чөгендерен алуга кереште. Районның төп авыл хуҗалыгы культураларының берсе булган татлы тамыр быел 9167 гектар мәйданда үстерелде. Уңыш җыюга берьюлы 12 “Ропа-Тигр” комбайны һәм 4 “Ропа-Маус” чөгендер төяү техникасы кереште. Әлегә алынган мәйданнардан уртача уңыш гектарыннан 420 центнерны тәшкил итә. Район авыл хуҗалыгы идарәсеннән хәбәр итүләренчә, барлык комбайннар да дәүләт техник күзәтүе үтеп, һәр комбайнга икешәр механизатор билгеләнгән. Зәй шикәр заводы исә яңа уңышны кабул итәргә әзер.