ЯҢАЛЫКЛАР

30 январь көнне Александро-Слобода бистәсе чаңгы осталары “Сәләмәтлек” спартакиадасы кыссаларында үткән чаңгы ярышларында катнаштылар. Анда авыл җирлегеннән Т.А. Илларионова, А.Н. Илларионов һәм Р.Р. Основина катнашты.

Зәйнең "Энергетик" мәдәният сараенда студентлар белән очрашу кичәсе яңа форматта оештырылды.Тулы зал булып килгән яшьләр алдында чыгыш ясаган район башлыгы Разиф Кәримов, районда 2015 елда ирешелгән уңышлар, һәр предприятие, оешмага аерым тукталып, аларга якын киләчәктә кирәк булган белгечләр, сәламәт яшәү рәвеше алып бару өчен һәр урында тудырылучы уңай шартлар турында сөйләде.

Бүген Зәйнең Яңа шәһәр янәшәсендәге урман буе шау-гөр килеп торды. Биредә махсус әзерләнгән чаңгы юлында көч сынашу өчен шәһәрнең предприятие, оешма хезмәткәрләре килде. Шәһәр беренчелегенә ярышта катнашучылар да, җанатарлар да шактый иде.

Иске Зәйнең музей хезмәткәрләре районда “Спорт һәм сәләмәт яшәү рәвеше Елы” н хуплап, гаилә белән тарихи урыннарны барлау йөзеннән чаңгыда йөрү оештырдылар. Алар музей тыюлыгында һәм иске Зәй урамнары буенча йөрделәр.

Үткән ел Зәй шикәр заводы бик зур эш башкарды – 50 ел гомер эчендә беренче тапкыр бер миллион тонна чимал эшкәртте. Яңа сезонга әзерлек производство туктатылуга башланып китте. 2015 елның 15 декабрьеннән хезмәткәрләр җиһазларны чистартуга керештеләр. 5 январьдан капиталь һәм агымдагы төзекләндерү эшенә керештеләр.

Укучылар баскетбол лигасының йомгаклау өлеше 5-7 февральдә Зәйдә үтәчәк. Ул 7 мәктәп һәм спорт – савыкландыру үзәгендә үтәчәк. “КЭС-Баскет” ярышларын ачу 5 февральдә 7 мәктәп бинасында үтәчәк. Керү ирекле.

2016 елның 1 гыйнварына социаль ярдәм күрсәтү органнарында зур ихтибарга лаек кешеләр исәптә торган: - Бөек Ватан сугышында катнашучылар һәм инвалидлар -49 кеше; - Тол калучылар – 233 кеше; - Тыл хезмәткәрләре -1036 кеше; - Хезмәт ветераннары – 4946 кеше; - Инвалидлар – 2965 кеше, 203 – балалар.

Районда эшләп килүче иктисад Советының чираттагы утырышы бүген хакимиятнең кече залында район башлыгы Разиф Кәримов җитәкчелегендә үтте. Ул Зәйдә эшләп килүче “Газ магистральләрен эксплуатацияләү оешмасы” эшенә багыәшланган иде.

Әтиле-уллы Владимир һәм Алексей Ревиннар әзерләгән егетләр каратэнең киокусинкай төре буенча Россия герое Александр Супонинский истәлегенә Әлмәт шәһәрендә үткән турнирда алдынгы урыннарны алдылар. Ярышларда Татарстанның Казан,Чаллы, Волжский, Чистай, Лениногрский, Бөгелмә, Кукмара, Базарлы Матак, Зәй, Баулы, Әлмәт, Сарапул, Туймазы, Октябрьский шәһәрләреннән җыелган командалар катнашты. Зәй яшүсмерләре 5-беренче, 2-икенче һәм 2- өченче урынны алдылар.Үз авырлык үлчәмнәрендә Виталий Бочкарев, Илназ Зыятдинов, Рамил Сөләйманов, Вадим Зеленин, Николай Прохоров алтын, Диләрә Әбзалова,Эдуард Мазманян көмеш, Максим Маракин, Эмиль Хөснетдинов бронза призга лаек булдылар.Болардан тыш, Зәй каратистлары беренче гомүмкоманда беренчелегенә чыктылар. Бүгенге көндә спортчылар каратэ буенча Татарстан беренчелегенә үтәчәк ярышларда катнашырга әзерләнәләр.

29 январьда сугыш һәм хезмәт ветераны Валентина Ивановна Буланенковага 90 яшь тулды. Аны котларга район башлыгы урынбасары Елена Недошивина һәм автоклуб хезмәткәрләре килде. Елена Владимировна юбилярга Россия Президенты В.В. Путин исеменнән котлау открыткасы, истәлекле бүләкләр тапшырды. Автоклуб хезмәткәрләре үзләренең изге теләкләрен һәм җырларын бхләк иттеләр.