ЯҢАЛЫКЛАР

Кичә “Зәй икмәк кабул итү предприятиесе” АҖендә 2013 ел эшчәнлегенә нәтиҗә ясау, 2014 елга бурычлар билгеләү буенча хисап җыелышы булды. Аның эшендә район башлыгы Татьяна Воропаева катнашты.

Кече Ватан елы кысаларында Зәйдә апрель аенда районда яшәүче халыкларның туй йолаларын күрсәтүгә иҗади конкурс оештырылачак. Иң матур, мәгънәле, үзенчәлекле дип табылган туйларның кияү белән кәләшен бүләкләү карала.

Зәй районында Бөтенроссия оборона-масса айлыгы бара. Ул Ватанны саклаучылар көненә багышланып, елдагыча 23 февральгә кадәр дәвам итә.

Политехник колледжда белем алучы авыл студентларының шактыен Сәвәләй мәктәбеннән килгән укучылар тәшкил итә. Уку йортының гер күтәрүчеләр командасында да күпчелек - әлеге мәктәптән килгән укучылар. Колледж белән мәктәп арасында тыгыз бәйләнеш бар дигән сүз бу.

Чаллы шәһәрендә үткән "Энҗе бөртеге" республика иҗат фестивалендә "Энергетик" Мәдәният сараеның "Улыбка" балалар хореографик ансамбле I дәрәҗә лауреат исемен яулады. Ансамбльнең урта төркеме - "Авыл кызы", "Күршеләр", кече төркем "Урман чишмәсе", "Шүрәле" бию-тамашасын күрсәтте.

«Энергетик» Мәдәният сараеның «Мирас», «Азаль» балалар вокаль-хореографик ансамбльләре чыгышлары белән район, республикада гына түгел, чит төбәкләрдә дә танылды. "Мирас" ансамбле оешканнан алып 15 ел эчендә күпме дистә бала ялгыз һәм күмәк җырлау серләрен үзләштерде, үз-үзен сәхнәдә танытты.

Мәдәният идарәсе район-шәһәр мәдәният йортлары арасында февраль аеннан "Без сәламәт - буын" дип исемләнгән наркотикларга каршы музыкаль-тематик чаралар проектына конкурс игълан итә.

Үзәк китапханә коллективы халык белән эшләүнең төрле юлларын эзли. Мирный бистәсе филиалы китапханәчеләре мәктәп автобусында бистәгә укырга йөрүчеләргә журналлар өләшә.

28 гыйнвардә район Советының утыз өченче утырышы булды. Депутатлар утырыш көн тәртибенә кертелгән ун мәсьәләне тикшереп, тиешле карарлар кабул итте. Утырышны Совет рәисе, район башлыгы Татьяна Воропаева алып барды.

Район газ хезмәте мәгълүматы буенча, 2015 елның 1 гыйнварыннан "Энергия саклау турында" 261нче Федераль Закон гамәлгә керә. Бу - газ куллану бары тик махсус исәпләү приборлары аша гына мөмкин була дигән сүз.