"Ачык ишекләр" көне

Политехник колледжда белем алучы авыл студентларының шактыен Сәвәләй мәктәбеннән килгән укучылар тәшкил итә. Уку йортының гер күтәрүчеләр командасында да күпчелек - әлеге мәктәптән килгән укучылар. Колледж белән мәктәп арасында тыгыз бәйләнеш бар дигән сүз бу. "Ачык ишекләр" көне гадәттә язын уздырыла, Сәвәләй мәктәбенең IX сыйныф укучылары гозере белән ул алар өчен күптән түгел оештырылды. Аларны колледж директоры Николай Воропаев һәм педагог-осталар җылы каршы алып, уку йортының үткәне, бүгенгесе, студентларның кызыклы һәм мавыктыргыч тормышы, колледжда нинди һөнәрләр алу мөмкинлеге, укырга керү өчен нинди документлар кирәк булуы турында мәгълүмат бирде. Аннан укучылар өчен уку бүлмәләре, остаханәләр, лабораторияләр буйлап экскурсия оештырылды. Студентлар исә алар өчен мастер-класслар күрсәтте. Кунаклар студентларның уку шартлары гына түгел, яшәү шартлары белән дә танышты.