ЯҢАЛЫКЛАР

Зәй музыка мәктәбе укучылары үз талантларын төрле бәйгеләрдә сынауны дәвам итә. Бу көннәрдә Чаллыда үткән “Җиде нота” IV республика бәйгесендә Анна Студёнова һәм Кристина Краснова дуэты I дәрәҗә лауреат булды.

Районыбызда яшь буынны тәрбияләүгә зур игътибар бирелә. Гамәлдәге муниципаль программаларның күпчелеге нәкъ менә шушы максатта кабул ителде. Укыту, тәрбия проблемаларына шәһәр Советы депутатлары да битараф түгел. Бу көннәрдә депутатлар шәһәр мәктәпләренең барысында да булып, бүгенге көн куйган таләпләр буенча тәрбия эшчәнлеге мәсьәләләре белән таныштылар.

13 февральдә Әлмәт Татарстанның иң көчле көрәшчеләрен үзенә җыйды. Биредә “Ватаным Татарстан” газетасы призына каһарман шагыйрь Муса Җәлил истәлегенә милли көрәш буенча 51нче республика ярышлары башланды. Турнир җомга көнне тәмамланачак. Анда Зәйдән дә көрәшчеләр командасы катнаша.

Бүген “Космос” яшьләр үзәгендә физкультура, спорт һәм туризм идарәсенең кече коллегия утырышы үтте. Анда идарәнең республика күләмендә иң яхшылар рәтендә булуы билгеләп үтелде.

Зәй районында Бөек Ватан сугышы ветераннары һәм тыл хезмәтчәннәренә игътибар кимеми. Бөек Җиңүнең 70 еллыгына әзерлек кысаларында 2013 елда сугыш ветераннары һәм инвалидларга (барлыгы 231 кеше) көчәйтелгән медицина тикшерүе уздырылды. Аның нәтиҗәләре буенча 65 ветеранга амбулатория-поликлиника һәм стационар шартларда дәвалау-сәламәтләндерү чаралары үткәрелде. Бер үк вакытта тыл хезмәтчәннәре диспансеризация узды.

Үзәк балалар китапханәсе базасында районда игълан ителгән Кече Ватан елы уңаеннан район-шәһәр мәктәпләре китапханәчеләренең семинар-киңәшмәсе узды. Анда сүз туган як тарихын пропагандалау, китап укучыларда ватанпәрвәрлек рухи тәрбияләү турында барды. Китапханәчеләр “Яраткан шәһәрем” дип исемләнгән электрон презентация күрсәтте. Соңыннан тәҗрибә уртаклашу, фикерләшүләр булды.

Зәйлеләр үзләренең игелекле эшләргә әзер булуларын район җитәкчелеге игълан иткән “Мәрхәмәтлелек акциясе”нә кушылулары белән янә раслады. Үзәк китапханәдә бер склад капчык-капчык кием-салым, кирәк-ярак, уенчыклар белән тулды. Кемдер кулланылышта булган киемнәр, кемнәрдер өр-яңаларын китерде. Халыкның бер-берсенә шулай ярдәмчел булуы – сокландыргыч хәл.

Кичә шәһәр Советы депутатлары халыкны шәхси сораулары белән үз сайлау участокларында кабул итте. Нигездә кешеләр торак-коммуналь хуҗалыгына мәсьәләләр белән килде.

"Космос" яшьләр үзәгендә педагогик хезмәт ветераннарына элекке укучылары - хәзерге вакытта төрле шәһәрләрдә белем алучы студентлар белән очрашу мөмкинлеге тудырылды. Шундый эчтәлекле кичәне яшьләр эшләре идарәсе беренче мәртәбә оештырды.

"Бердәм Россия" сәяси партиясенең Зәй җирле бүлеге бүген 42 башлангыч оешмада 3288 партия әгъзасын берләштерә. Узган ел партия сафларына 60 зәйле кабул ителгән.