ЯҢАЛЫКЛАР

Бүген Казанга Ливан, Мисыр, Сирия, Ирак, Бахрейн, Берләшкән Гарәп Әмирлекләре, Төркия, Согуд Гарәбстаны, Иордания, Палестин, Алжир һ.б. илләрдән абруйлы һәм танылган галимнәр "Коръәннең Казан басмасы: тарихи кыйммәте һәм киләчәге" дип исемләнгән халыкара ислам дини-илаһият конференциясенә җыелдылар.

2 нче апрельдә район Башкарма комитеты җитәкчесе башлыгы И.Ф. Хафизов җитәкчелегендә, шәһәр Башкарма комитеты җитәкчесе С.В.Максимов, район торак- коммуналь идарәсе белгечләре, торак ширкәте һәм идарәче органнары хезмәткәрләре катнашында шәһәребез урамнарында рейд оештырылды. Анда катнашучылар шәһәр ишек алды территорияләрендә булып, юллар һәм җәяүлеләр йөри торган урыннарның торышын тикшерделәр, торак-коммуналь хуҗалыкларда эшләүчеләрнең башкарган эшләренә бәя бирделәр. Бүген шәһәребезнең Ленин, Энергетиклар, Никифорова, Октябрь, Төзүчеләр, Тавлина, Жукова һәм Җиңү Проспекты урамнары ишек аллары тикшерелде. Җаваплы хезмәткәрләргә йорт түбәләрендәге, ишек алларындагы кар өемнәрен, бозлы урыннарны тиз арада чистартып, тәртипкә китерергә кирәклеге тагын бер кат искәртелде.

Бүген - 1 апрельдән хәрби хезмәткә язгы чакырылыш кампаниясе башланды. Соңгы елларда районыбыз гражданнарны хәрби хезмәткә чакыру буенча бурычларны уңышлы үтәүче муниципаль берәмлекләр исемлегенә керде. Чакыру буенча Ватан алдындагы изге бурычын вакытында үтәргә теләк белдерүче егетләр күбәйде. Хәрби хезмәткә язгы чакырылыш 1 апрельдә башланып, 15 июльгә кадәр дәвам итәчәк. Шушы чорда 40тан артык егетне ил сагына алу планлаштырыла.

31нче март көнне Кадер авылында “Иҗади десант: яшьләр бүген, иртәгә” дип исемләнгән фестиваль үткәрелде. Аның максаты: сәламәт яшәү рәвешен пропагандалау, җәмгыятьтәге тискәре күренешләрне кисәтү, балалар һәм яшьләрнең иҗади активлыгын үстерү.

Югары Шепкә авылында яшәүче Факиһә Хәйрулла кызы Фәйзуллина шушы көннәрдә үзенең 95 яшьлек юбилеен билгеләп үтте. Аны гомер бәйрәме белән котларга район башлыгы урынбасары В.Г. Акатьев, Югары Шепкә авыл җирлеге башлыгы А.Х. Ишмәтов килделәр.

Татарстан Республикасы Президенты Р.Н. Минниханов йөкләмәсе һәм ТР Мәгариф һәм фән министрлыгының 15.09.2016 елгы 8502/16 номеры белән бирелгән хаты нигезендә Зәй муниципаль районында мәктәп яшендәге балаларны йөзүгә өйрәтүгә юнәлтелгән «Йөзү буенча гомуми укыту» проекты гамәлгә ашырыла. Язгы каникуллар вакытында гомуми белем бирү оешмалары өчен дәрестән тыш сәламәтләндерү эшчәнлеге кысаларында шәһәр бассейнында йөзү буенча күнекмәләр үткәрелә. Эш Мәгариф идарәсе графигына таянып 5-8 сыйныф укучылары белән алып барыла.

“Яшьлек” боз сараенда авыл мәктәпләре арасында хоккей буенча ачык ярышларның 3 нче этабы узды. Ярышларда Аксар, Кәдер, Югары Шепкә, Александр Бистәсе,Чубыклы һәм Якты Күл мәктәпләре катнашты. Урыннар түбәндәгечә билгеләнде: 1 нче урын -Аксар авылы мәктәбе, 2 нче урын Кадер авылы мәктәбе, 3 нче урын Югары Шепкә авылы мәктәбенә бирелде. “Иң яхшы һөҗүм итүче” номинациясендә Нәфис Гыйниятов (Аксар авылы), “Иң яхшы саклаучы”номинациясендә Цыганов Игорь (Кадер авылы),“Иң яхшы капкаччы” номинациясенедә Әхүнҗанов Илнур җиңүче булды. Җиңүчеләр район Башкарма комитетының Грамота, медаль һәм кубокларына лаек булдылар.

1 апрельдән Татарстанда санитар- экология ике айлыгы башланды. Ул 1 нче апрельдән 31 майга кадәр дәвам итәчәк. Бу көннәрдә Татарстанның табигатьне саклау ведомстволары көчәйтелгән эш режимына күчәләр. Зәйдә ишек аллары, парклар һәм скверлар, урам буйларындагы яшеллекләр сфетофор яннары һәм юл тамгалары, торак йортлар һәм балалар бакчалары мәйданчыклары чистартылачак.

28 нче мартта, республика программасы кысаларында агымдагы елда районда төзелүче һәм капиталь ремонт ясалучы социаль объектлар тикшерелде. Аның эшендә Район Башкарма комитеты җитәкчесе И.Ф.Хафизов, аның урынбасары Н.А.Нифатов, Татарстан Республикасы (ГИСУ) Көньяк-Көнчыгыш территориаль идарәсе кураторы Д.Р.Рафыйков, район торак-коммуналь хуҗалыгы бүлеге белгечләре һәм хезмәткәрләре катнашты. Комиссия әгъзалары һәр объектта булып, эшне башкару вакыты һәм графигы белән таныштылар. Район Башкарма комитеты җитәкчесе И.Ф.Хафизов төзү һәм төзекләндерү эшләрендә техника куркынычсызлыгы кагыйдәләрен төгәл үтәү һәм эшне сыйфатлы итеп башкару кирәклеге хакында тагын бер кат аңлатты.

28 нче мартта Татарстан Республикасында Кеше хокуклары буенча вәкаләтле вәкил Сәрия Сабурская коллектив мөрәҗәгатьнең үтәлешен өйрәнү максатында, бистә халкы белән очрашты. Очрашудан соң, “Халык контроле” Татарстан Республикасы дәүләт мәгълүмат системасына килгән мөрәҗәгатьләрне карау мониторингын тормышка ашыру кысаларында, Татарстан Республикасында Кеше хокуклары буенча вәкаләтле вәкил Сәрия Сабурская район башкарма комитеты җитәкчеләре һәм җаваплы хезмәткәрләре белән киңәшмә уздырды. Утырышта җитди контрольда булган документларның үтәлеше каралды. Татарстан Республикасында Кеше хокуклары буенча вәкаләтле вәкил Сәрия Сабурская “Халык контроле”нә килгән мөрәҗәгатьләрнең Зәй районы буенча үтәлешенә уңай бәя бирде.