ЯҢАЛЫКЛАР

6 сентябрьдә иртәнге сәгать 9дан 11 гә кадәр Россия Федерациясе Дәүләт Думасы депутаты Айрат Хәйруллин Зәйдә гражданнарны кабул итәчәк. Кабул итүләр Зәй шәһәре, Крупской урамы, 6 йортның утырышлар залында (59 нчы бүлмә) узачак. Алдан язылу сорала, 8(85558) 7-30-94 телефоны буенча язылырга мөмкин.

 Хөрмәтле укучылар һәм студентлар, әти-әниләр, педагоглар һәм мәгариф ветераннары! Белем көне һәм яңа уку елы башлану уңаеннан ихлас котлауларны кабул итегез. 1 сентябрь - бөтен җәмгыять һәм һәр кеше өчен зур әһәмияткә ия булган гомумхалык бәйрәме. Тәүге тапкыр мәктәп бусагасын атлап кергән, беренче укытучысы белән танышкан, дулкынландыргыч һәм мавыктыргыч белем дөньясына аяк баскан көнен һәркайсыбыз яхшы хәтерли. Балачак һәм яшүсмер чорының иң якты хатирәләре мәктәп еллары белән бәйле. Аеруча бу көн мәктәптә укыячак балалар өчен тантаналы. Быел яңа уку елында шәһәр-районда парта артына 5130лап укучы утырачак, аларның 606сы - мәктәп бусагасын тәүге тапкыр атлап керүче. Политехник колледжда 150 студент һөнәри белемгә беренче адымнарын ясаячак. Күп еллар дәвамында муниципаль районның социаль-икътисади сәясәтендә мәгариф системасын үстерү өстенлекле юнәлеш булып тора. Районда мәгариф өлкәсен үстерүдә уңай шартлар тудыру максатында 2018 ел Мәгариф елы дип игълан ителде. Безнең бурычыбыз - төп күрсәткечләрне яхшырту һәм районыбызның яшь гражданнары тирән төпле белем алсын һәм үзенең талантын күрсәтә алсын өчен барлык мөмкинлекләрне эшкә җигү. Укытучылар, мәгариф системасы хезмәткәрләренә сайлаган һөнәрләренә тугры калып, җиңел булмаган хезмәтләрендә тырыш-түзем булганнары өчен рәхмәт белдерәм. Алга таба да үзләренең зирәклеге, тәҗрибәсе, талантына таянып, безнең укытучылар яшь буынны укыту һәм тәрбияләүдә барысын да эшләр дип ышанам. Уку елы яңа уңышлар-казанышларга бай булсын! Сезгә бәхет, иминлек, сәламәтлек, хыялларыгызның тормышка ашуын телим. Р.Г. Кәримов,муниципаль район башлыгы.

Зәйдә Шәһәр көненең күңел ачу чаралары, һәр елдагыча, Ринат Шәехович исемендәге ял паркында узды. Быелгы бәйрәм чараларга аеруча бай булды. Көн дәвамында биредә балалар, яшьләр һәм өлкәннәр өчен берсеннән-берсе мавыктыргыч, кабатланмас бәйгеләр, уеннар, төрледән-төрле күргәзмәләр, интерактив мәйданчыклар эшләде. Башка еллардан аермалы буларак, быел аларның урнаштыру да яхшы итеп уйланылган иде. Берничә урында урнаштырылгпн сәхнәләр җыр-биюдән тынып тормады. Бәйрәмне ачу тантанасында зәйлеләрне һәм шәһәребез кунакларын район башлыгы Разиф Кәримов котлады. “Яраткан Зәебез чорлар аша” дип аталган музыкаль-хореографик композиция тамашачыга шәһәр-район тарихын күзаллау мөмкинлеге бирде. “Сәнгать бульвары” булдырып, сәләтле балалар һәм яшьләр чыгышлары бер урамда оештыру, үзәк сәхнәдә бер төркем яшьүсмерләргә паспортлар тапшыру, “Объективта – Зәй” фотоконкурсы, паркта никахка керүче яшь парларны теркәү, туган як тарихын өйрәнү музееның “Совет чоры көнкүреше” экспозициясе, әдәби кафе (үзәк китапханә) һ. б. бәйрәмнең яңалыклары булды. Төп сәхнәдә татар эстрадасы йолдызлары Салават Миңнеханов һәм Гүзәлем, Иркә, “Казан егетләре” төркеме һәм Россиядә билгеле “Тутси” төркеме җырчысы Анастасия Крайнова чыгыш ясады. Бәйрәм гадәттәгечә салют белән тәмамланды.

Республика һәм Шәһәр көне Зәйдә мөһим вакыйгалар белән башланып китте. Аларның берсе - зәйлеләр сәламәтлеге өчен бик тә мөһим булган поликлиника һәм диагностика үзәгенең зур төзекләндерү эшләреннән соң ишекләрен ачуы. Заманча сәламәтлек учреждениесен тантаналы төстә ачуда Татарстан хөкүмәтеннән Зәй районы кураторы Фәрит Хәнифов, республика сәламәтлек саклау министрлыгының идарә башлыгы Фәнис Исхаков катнаштылар. Алар кызыл тасманы район башлыгы Разиф Кәримов һәм район җитәкчелеге белән бергәләп кистеләр. - Татарстанда халык сәламәтлеген кайгырту Президент программалары нигезендә башкарыла. Медицина учреждениеләрен төзекләндерү, аларда заманча шартлар тудыру да шуның бер юнәлеше. Бүген без Зәйдә менә тагын бер шундый бинаны файдалануга тапшырабыз. Ул кешеләрнең сәламәтлекләрен контрольдә тоту, үз вакытында савыктыру урыны булсын, халык саулыгы өчен хезмәт итсен, - диде Фәнис Исхаков. Ә Фәрит Хәнифов үз чыгышында Зәйдә һәр мөһим объектны тиз арада төзеп, төзекләндереп файдалануга тапшыру буенча уңышлы эшләүләрен билгеләп үтте. Район җитәкчелегенең бу юнәлештә билгеле тәртип саклавына соклануын белдерде. Бинаны “Сәяр”, “Омега” ҖЧШ төзүчеләре өч ай ярым эчендә заманча таләпләргә яраклаштырып эшләде. Район җитәкчелеге төзекләндерү барышын даими контрольдә тотты. Яңартылган поликлиникада хәзер бер сменада 366 пациентны кабул итү мөмкинлеге бар, - ди баш табиб Рим Әмиров. Төрле органнарны күзәтү - тикшерү кабинетларын төзекләндерү белән беррәттән, алар һәрберсе яңа медицина җиһазлары белән дә баетылган. Поликлиника белән беррәттән төзекләндерелгән диагностика үзәге дә республика бюджеты хисабына башкарылды. Хәзер биредә тиз арада шактый катлаулы диагностиканы да үткәрү мөмкин булачак. Поликлиника һәм диагностика үзәгенә керү комплексы бер була. - Кешеләргә уңайлы булсын өчен бер урыннан кереп һәр кабинетка бару, дагностика үтү урыннары махсус таблода күрсәтеләчәк. Балалар табибларына да поликлиникадан урамга чыкмыйча гына үтү мөмкин була, - дип ассызыклады Рим Әмиров. Разиф Кәримов исә, сәламәтлек саклау учреждениесенең халыкка озак еллар нәтиҗәле, сыйфатлы хезмәт күрсәтү урыны булуын теләде. Бертөркем төзүчеләргә, медицина хезмәткәрләренә Рәхмәт хатлары тапшырылды. Бүген зәйлеләр өчен тагын бер сөенечле вакыйга – төзекләндерү эшләреннән соң “Алтынчәч” балалар бакчасы ачылды. Әлеге бакча моннан өч дистә ел элек файдалануга тапшырылган булса да, моңарчы капиталь төзекләндерелмәгән булган. Быел исә ул капиталь төзекләндерү республика программасына кертелгән. Әлеге объектта ремонт эшләрен Әлмәттән «Татспецстрой» җаваплылыгы чикләнгән ширкәте алып барды. Бакчаның электр челтәрләре, су һәм җылылык системалары, канализациясе алыштырылган, түбәсе сөзәк итеп ябылган. Беренче каттагы уен бүлмәсенә җылы идән системасы түшәлгән. Бина тышкы яктан җылытылып, ул заманча материал - керамик-гранит плитә белән тышланган. Искиткеч матур төсләргә буялган бина хәзер игътибарны әллә кайдан җәлеп итеп тора. Бакчаны тантаналы төстә ачуда катнашкан, Татарстан Президенты Рөстәм Миңнеханов котлауларын ирештергән, республиканың Зәй районы кураторы Фәрит Хәнифов, зәйлеләрнең һәртөрле социаль программаларда актив катнашуын билгеләде, өлгер, җитез, сыйфатлы, уңышлы эш алып баруларын тагын бер кат ассызыклады, республикада һәр юнәлештә алдынгы булуларын югары бәяләде. Ә бакча ачылуга әти-әниләр, балалар бик шат булулары белән уртаклаштылар, республика, район җитәкчелегенә рәхмәтләрен белдерделәр.

Хөрмәтле зәйлеләр һәм шәһәр-районыбыз кунаклары! Сезне чын йөрәктән Татарстан Республикасы һәм Шәһәр көне белән котлыйм. Республика көне - күпмилләтле Татарстан халкының тынычлык һәм иминлек, бердәмлек символы бәйрәме ул. Без төбәгебезнең байлыгы, аның бай тарихы белән хаклы рәвештә горурланабыз һәм шушы уңышларга ирешергә мөмкинлек биргән өлкән буын, аларның хезмәте, батырлыгы алдында баш иябез. Безнең республиканы Россиядән чит төбәкләрдә дә яхшы беләләр. Ул халыкара хезмәттәшлек дәрәҗәсендәге чит ил инвестицияләрен үзенә җәлеп итә. Күптән түгел республикабыз башкаласында футбол буенча үткәрелгән Дөнья чемпионаты халыкара масштабта иҗтимагый-сәяси вакыйга буларак тарихка кереп калды. Республика һәм районыбызда яшәүчеләр дә әлеге мөһим вакыйгада катнаштылар. Футбол буенча Дөнья чемпионаты тагын бер мәртәбә Татарстан халкының бердәм һәм туган республикабыз хакына теләсә нинди мәсьәләләрне чишәргә әзер булуын күрсәтте. Без туган Татарстаныбызда, республикабызның иң төзек шәһәрендә яшәвебез һәм хезмәт куюыбыз белән хаклы рәвештә горурланабыз. Районыбызда федераль һәм республика программалары уңышлы тормышка ашырыла. Алар нигезендә шәһәр-районда клублар төзелә, сәламәтлек саклау учреждениеләре, белем бирү учреждениеләре һәм күпфатирлы йортлар ремонтлана, юллар, тротуарлар салына. Урып җыю эшләре төгәлләнүгә бара. Район игенчеләре бөртекле культуралардан һәм шикәр чөгендереннән яхшы уңыш үстерделәр. Бу уңышларда сезнең һәркайсыгызның да өлеше бар. Хөрмәтле зәйлеләр, сезгә фидакарь хезмәтегез өчен рәхмәт белдереп, чын күңелемнән ныклы сәламәтлек, киләсе көннәргә ышаныч, туган шәһәребез һәм Татарстаныбыз хакына нәтиҗәле хезмәтегездә уңышлар, бәхет һәм иминлек телим. Разиф Кәримов, муниципаль район башлыгы.

Бүген Татарстан Президенты Рөстәм Миңнеханов Республика көне уңаеннан муниципаль районнар арасындагы республика смотр-бәйгесендә җиңүчеләргә машина ачкычлары тапшырды, дип хәбәр итә “Татар-информ” агентлыгы. Муниципаль районнарга бирелгән 93 автомобильнең икесе Зәй районына кайта. Бүген Президент кулыннан машина ачкычларын тантаналы төстә Аксар һәм Сәвәләй авыл җирлекләре башлыклары алды. Бәйгегә барысы 200дән артык гариза кергән булган, шулар арасында зәйлеләрнең дә җиңү яулавы, машиналы булуы куанычлы.

Хөрмәтле зәйлеләр һәм шәһәр-районыбыз кунаклары! Сезне 30 августта Шәһәр көненә багышланган бәйрәмгә чакырабыз! Программада: Ринат Фәрдиев исемендәге паркта балалар мәйданчыгы 13.00-16.00-балалар өчен күңел ачу чарасы “Энергия” стадионы 14.00-16.00 – мини футбол буенча турнир, стритбол ярышлары Ипподром 15.00 – район башлыгы кубогына картинг ярышлары Ринат Фәрдиев исемендәге паркта спорт мәйданчыгы 16.00-19.00 –балалар-яшүсмерләр мәктәпләрендә алып барылучы спорт төрләрен презентацияләү: стендлар, кубоклар күргәзмәләре, күрсәтмә чыгышлар, “Спортлы Зәй” фитнес-тренировкасы, черлидинг буенча мастер-класс, эстафета ярышлары ФОК каршындагы мәйдан 16.00-18.00 – бәйрәм концерты, мастер-класслар, “Шах һәм мат” уен программасы Казначылык бинасы каршындагы мәйданчык 17.00-19.00 – “Турнир юнәлеше” урта гасырлар сугышы буенча шоу Ефимов урамындагы мәйданчык 17.00-19.00 - «Мәдәниятле SDVIG» сәнгать бульвары Ринат Фәрдиев исемендәге парк 16.00-19.00 – “Һөнәрләр шәһәре” кидспейсы 17.00-19.00 – “Утырып... укыйк” әдәби кафесы 17.30 – 18.30 - “Мәрхәмәтлелек, мәхәббәт һәм бәхет причалы” гаилә бәйрәме Ринат Фәрдиев исемендәге паркта төп сәхнә 17.00-18.00 “СССРга кайту” ретро программасы. “Визит” вокаль-инструменталь ансамбле һәм шәһәр үзешчәннәре чыгышы 18.00-18.05- “Безнең шәһәр” видеоролигы 18.05-18.25 – бәйрәмне тантаналы төстә ачу, “Мин – Россия гражданины” паспортлар һәм “Хезмәт кешесе” премияләрен тапшыру 18.25-18.35 – “Биюче рәссам” Алинә Хәйруллина чыгышы 18.35-20.00 – шәһәр артистлары чыгышы 20.00-21.00 – татар эстрадасы артистлары җырлый 21.00-22.00 - рус эстрадасы “йолдызлары” чыгышы 22.00 – бәйрәм салюты

Яңа уку елы башланырга санаулы гына көннәр калды. Әлеге тема Зәй районы башкарма комитеты каршындагы юл хәрәкәте куркынычсызлыгын тәэмин итү комиссиясе утырышында да төп мәсьәлә булды.  Юл хәрәкәте куркынычсызлыгы һәрвакыт мөһим, әмма балаларыбызны юл афәтләреннән саклау икеләтә-өчләтә игътибар сорый. Һәр мәктәп автобусы маршруты тиешле таләпләрне үтәп йөрергә, һәр мәктәптә балаларга юл кагыйдәләрен җитди аңлату эшләре алып барылырга тиеш. Җәйге каникуллардан соң аларга юл йөрү тәртибен даими искәртеп тору кирәк, бу педагогларга да, әти-әниләргә дә кагыла. Укуларның беренче көнендә-3 сентябрьдә һәр мәктәптә линейкалар ясап, аларда ЮХИДИ инспекторларының катнашуы кирәк, - диде комиссия рәисе, район башкарма комитеты җитәкчесе Илнар Хафизов. Башкарма комитет җитәкчесе кагыйдә бозган һәр мәктәп баласы белән аерым сөйләшү мөһимлеген дә ассызыклады. Районда 20 августтан 9 сентябрьгә кадәр “Игътибар, балалар!” айлыгы бара. Бу арада ЮХИДИ инспекторлары балалар учреждениеләре тирәсендә көчәйтелгән режимда эшли. Ә мәктәп автобусларына килгәндә, районда алар - 18. Һәр автобусның төзеклеге, педагоглар тарафыннан озатылып йөрелүе турында да мәгълүмат бирелде. Комиссия утырышында юлларны төзекләндерелү торышы да  тикшерелде.

28 августа Зәй политехник колледж ашханәсендә районкүләм Корбан аш узды. Анда 200 ләп зәйле килде. Район башлыгы Р.Г. Кәримов чарада катнашучыларны бәйрәм белән котлады, район күләмендә башкарылучы чаралар, авыл хуҗалыгы өлкәсендәге эш нәтиҗәләре белән таныштырды. Зәй мөселманнары бу көнне сый-нигъмәттән авыз итеп, вәгазь тыңлап, дога кылып, үзара хәл-әхвәл сорашып, тагын бер кат күңелләрен сафландырдылар. Имам-мөхтәсиб Фатих хәзрәт Нуруллин белдерүенчә, мондый Корбан ашлары районыбыз һәм шәһәребезнең башка мәчетләрендә дә уздырылды.

Хөрмәтле зәйлеләр! 4 сентябрь көнне Зәй муниципаль районы хакимиятенең 59 нчы бүлмәсендә балаларга алиментлар түләү мәсьәләләре буенча халыкны бердәм кабул итү була. Алдан язылу өчен телефон:3-41-10