ЯҢАЛЫКЛАР

Олыгаю чорының барлык мәшәкатьләрен искәрткәндәй, табигать төрле-төрле төсләргә бизәлгән бер мәлдә Өлкәннәр көнен билгеләп үтү бик тә табигый. Бу чор үзен акрын гына сиздереп, һәр кешенең гомер көзләрен якынайта. Аны икенче төрле зирәк кешеләр бәйрәме дип тә йөртәләр. Өлкәннәр көне алдыннан Зәй туган як тарихын өйрәнү музеенда “түгәрәк өстәл” артында очрашу үтте. Очрашуга музей ветераннары һәм анда эшләүчеләрнең әти-әниләре чакырылды. Өлкәннәр өчен музей буйлап экскурсия оештырылды, аннан соң алар чәй өстәле артында, борчу-мәшәкатьләрдән арынып, бер-берсе белән аралашты, төрле бәйгеләрдә катнашты. Чара котлаулар, күңелдә уелып калган кызык¬лы хәлләр, хатирәләр белән үрелеп барды.

Бүген иртәнге с.9да Зәйнең шартлау булган Никифоров урамының 71нче йортында фатир хуҗаларына ачкычлар тапшыру башланды.

Хөрмәтле өлкән буын вәкилләре! Сезне чын күңелдән зирәклек һәм шәфкатьлелек бәйрәме – Халыкара өлкәннәр көне белән котлыйм. Бу көнне без сезгә фидакарь хезмәтегез, кешелеклелек һәм зирәклек кебек сыйфатларыгыз өчен хөрмәтебезне һәм рәхмәт сүзләрен белдерәбез. Сугыш чоры авырлыкларын үз җилкәсендә күтәргән, илебез бәйсезлеге өчен көрәшкән, сугыштан соңгы авыр елларда илебезне торгызуга өлеш керткән ветераннарыбызга аерым рәхмәт сүзләрен җиткерәсе килә. Без сезнең сабырлыгыгыз алдында баш иябез, һәрвакыт сездән үрнәк алабыз. Сез шулай ук әхлакый-рухи кыйммәтләрне һәм гореф-гадәтләрне саклаучы да, үсеп килүче яшь буынга терәк һәм ышанычлы ярдәмчеләр булып торасыз, һәркемгә булышырга тырышуыгыз һәм төпле киңәшләрегез безгә тормышта ярдәм итә. Шунысы куанычлы, сезнең күпләрегез әле бүген дә безнең белән бер сафта, яшь буынны патриотизм, югары әхлак идеаллары рухында тәрбияләргә ярдәм итәсез, балаларыгыз һәм оныкларыгызда үз үрнәгегездә хезмәт сөючәнлек, рух ныклыгы кебек сыйфатлар тәрбиялисез. Районның җәмәгать һәм мәдәни тормышында актив катнашуыгыз сезгә карата хөрмәт уята. Лаеклы ялдагыларны, яшенә карамастан хезмәтен дәвам итүчеләрне – барыгызны да бәйрәм белән котлыйм. Иң ихлас теләкләремне кабул итегез –һәммәгезгә дә ныклы сәламәтлек, күңел күтәренкелеге, тынычлык һәм иминлек телим. Сезнең тормышта күңелле вакыйгалар күбрәк булсын, якыннарыгыз һәм туганнарыгызның яратуын һәм кайгыртуын тоеп яшәгез.

30 сентябрь көнне "Энергия" стадионында спорт ветераннары арасында Зәй шәһәрендә "Күн туп" ярышларының 50 еллыгына һәм өлкәннәр көненә багышланган очрашу булып узды. Ветераннарга сәламләү сүзе белән Зәй шәһәре Башкарма комитеты җитәкчесе С. В. Максимов мөрәҗәгать итте. Һәр катнашучыга истәлекле медальләр һәм статуэткалар тапшырылды.

27-30 сентябрь көннәрендә Биектауда 16 яшькә кадәрге егетләр арасында баскетбол буенча Татарстан беренчелеге узды. 7 команда арасында Зәйнең "Барс» балалар һәм яшүсмерләр спорт мәктәбе командасы 3 нче урынны алды. (Тренерлары: К.Х.Асадов һәм И.А. Волков)

27-30 сентябрь көннәрендә Казахстанда ирекле көрәш буенча халыкара турнир узды. Ярышларда "Зәй" балалар-яшүсмерләр спорт мәктәбендә тәрбияләнүчеләр: Хөснуллин Руслан, Салихов Тимур 2 нче, Дәүләтов Алмаз һәм Ходжаев Раил 3 урыннарга лаек булдылар.(Тренерлары Салихов Р. Ф.)

Бүген хакимият бинасының кече залында район икътисади советының чираттагы утырышы узды. «Зәй элеваторы» ҖЧҖнең 2018 елның 1 яртыеллыгындагы эшчәнлеге нәтиҗәләре, 2018 елгы эшчәнлекнең көтелгән нәтиҗәләре һәм 2019 елга перспектив планнар турында» темасына доклад белән «Агрокөч» АҖ генераль директоры урынбасары Илья Батаев чыгыш ясады.

Бүген Зәйдә Бөтендөнья татар конгрессы Башкарма комитеты "Ак калфак" хатын-кызлар оешмасының күчмә утырышы узды.«Суккан палас өстендә йомры калач» дип аталган чара “Энергетик” мәдәният йорты каршында кунаклар өчен оештырылган көзге ярминкәне караудан башланды. Чарада 5 регион һәм 34 районнан килгән делегация катнашты. Күчмә утырышның программасы бик бай эчтәлекле әзерләнгән иде. «Тылсымлы әкият» балалар бакчасы “Балалар бакчасында кунакта әбиләр” уен мәйданчыгы эшен күрсәтте. Имәнлебаш мәдәният йортында “Икмәк хикмәтләре”, “Сепарат аерту” йолаларын һәм Таҗетдин Ялчыгол күргәзмәсен карау, Кадер мәдәният йортында “Суккан палас”, «Кап сугу», «Май чабу базары» йолаларын искә төшерү, Наил Дунаев, Мөдәррис Әгъләмов иҗатына багышланган күргәзмәләрдә булу, Бигеш мәдәният йортында “Җыен базары” сәхнәләштерелгән тамашасын карау, академик Мансур Хәсәновның тормыш юлына һәм иҗади эшчәнлегенә багышланган күргәзмәдә булу шуның ачык дәлиле. Күчмә утырышның пленар өлеше “Энергетик” мәдәният йорты бинасында Зәй муниципаль районы башлыгы Разиф Гали улы Кәримовның сәламләү сүзе белән башланып китте. “Ак калфак” иҗтимагый оешмасы җитәкчесе Энҗе Гәбделбәр кызы Әхмәтҗанова ел дәвамында районда эшләнгән эш нәтиҗәләре белән таныштырды. Бөтендөнья иҗтимагый татар хатын-кызлар оешмасы рәисе Кадрия Рәис кызы Идрисова республика күләмендә алып барылган эшләр турында җентекләп сөйләде һәм Ак калфак” җирле иҗтимагый оешмасының иң актив хатын-кызларына Рәхмәт хатлары тапшырды. Чарада катнашучылар “Азаль”, “Мирас” вокаль-хореография ансамбльләре, “Легенда” бию ансамле, “Ак калфак” бәйгесендә җиңүче балалар чыгышларын яратып карадылар. Хәзерге чор татар модасы күпләрдә зур кызыксыну уятты. "Ак калфак" хатын-кызлар оешмасы вәкилләре зәйлеләрнең эшчәнлегенә зур бәя бирделәр, киләчәктә дә милли рухны саклау буенча уңышлар теләделәр һәм ихлас күңелдән рәхмәт сүзләрен җиткерделәр.

Бүген район башлыгы Р.Г. Кәримов капиталь ремонт һәм төзелеш объектларында булды. Тикшерү барышында район башлыгы агросәнәгать паркында, «Мәктәп тавы» пляжында, Мичурин урамы 12нче б. йортында урнашкан шәһәр мәдәният йортында, С. Рәфыйков исемендәге Үзәк китапханәдә, Никифор урамының 71 нче йортында булды һәм әлеге объектлардагы эш торышы белән якыннан танышты. Район башлыгы белән бергә әлеге чарада аның урынбасары В.Г. Акатьев, район Башкарма комитеты җитәкчесе И.Ф. Хафизов һәм башка җаваплы хезмәткәрләр катнашты. Тикшерү нәтиҗәләре буенча Р.Г. Кәримов җаваплы хезмәткәрләргә тиешле күрсәтмәләр бирде.

28 сентябрь көнне Зәй районы мәдәният йорты каршындагы мәйданда өлкән яшьтәге гражданнарга ярдәм күрсәтү йөзеннән традицион мәктәп авыл хуҗалыгы ярминкәсе узды. Киштәләрдә тәкъдим ителгән яшелчә һәм җиләк-җимешләрне педагоглар, тәрбиячеләр, мәктәп һәм балалар бакчаларында тәрбияләнүчеләр үстерделәр. Шәһәр халкы түбән бәяләрдән кишер, кәбестә бәрәңге һәм мәктәп укучылары һәм студентларның үз куллары белән әзерләнгән көнкүреш әйберләрен дә сатып ала алды. Бердәм хезмәт һәм яхшы уңышның кереме дә әйбәт булды.