ЯҢАЛЫКЛАР

10-13 майда Салават шәһәрендә билбау көрәше буенча РФ Кубогына ярышлар узды. Анда Зәй көрәшчеләре дә катнашы. Үз авырлыгында Екатерина Бусова чемпион калды. Регина Салихова көмеш, Равил Зәйнәшев, Илдар Хәмитов, Рамил Гыйләҗетдинов бронза медальгә лаек булды.

13 нче майда Түбән Кама шәһәренең “Дуслык” спорт сәламәтләндерү комплексында тренер Виктор Германович Сазонов истәлегенә җиңел атлетика буенча ярышлар узды. Зәйдән ярышларда “Барс” спорт мәктәбендә тәрбияләнүчеләр катнашты. 800 метр аралыкка йөгерү буенча 2001 елда туган Шәрәфиева Алия һәм 2004 елда туган Акулова Карина 2 нче урынны алдылар. Тренерлары Дылевская И.В.

17 нче майда Россия Федераль монополиягә каршы хезмәтнең Татарстан идарәсе җитәкчесе урынбасары А.Г.Шәфигуллина җирле үзидарә органнарында эшләүчеләрне һәм эшмәкәрләрне кабул итә. Кабул итүгә алдан язылу өчен телефон номерлары: 8(85558) 3 -13 -37, 3 – 41 - 33

Россиядә футбол буенча Дөнья чемпионаты 14 июньнән 15 июльгә кадәр үтәчәк. Казанда турнирның алты матчы узачак: «Kaзан-Aрена» стадионында Франция - Австралия, Испания - Иран, Польша - Колумбия һәм Германия - Көньяк Корея төркем этабы матчлары булачак. Шулай ук Татарстан башкаласында финалның сигездән бер матчы һәм бер чирек финал матчы үтәчәк.

Европа иммунлаштыру атналыгы кысаларында “Зәй шәһәре мәшгульлек үзәге” дәүләт казна учреждениесе хезмәткәрләре каршында Зәй, Әлмәт, Лениногорск районнарында кулланучыларның хокукларын яклау һәм кеше иминлеге өлкәсендә күзәтчелек федераль хезмәте идарәсенең территориаль органы башлыгы вазифаларын башкаручы Ринат Насыйбуллин, Зәй үзәк дәваханәсе баш табибы урынбасары Фалих Зәйнуллин чыгыш ясады.

12 майда спорт-сәламәтләндерү үзәгендә якташыбыз, авыр атлетика буенча - СССРның, гер спорты һәм милли көрәш буенча РСФСРның спорт остасы Василий Николаев истәлегенә (2000 — 2001, 2002 елларда туган) яшүсмерләр һәм кызлар арасында Республика ярышлары узды. Ярышларны ачу тантанасында Башкарма комитет җитәкчесе И.Ф. Хафизов, аның урынбасары А.В. Чапков, спорт һәм туризм идарәсе башлыгы Р.Р. Мәвләвиев катнашты. Илнар Фанилевич спортчыларны сәламләп, аларга уңышлы стартлар теләде.

Агымдагы елның гыйнвар-апрель айларында Зәй мәшгульлек үзәгенә төрле сораулар белән 495 кеше мөрәҗәгать итте. Аларның 242се – эш эзләүче, 205 кеше эшкә урнаштырылды. 1 майга үзәктә 189 граждан эшсез буларак исәптә тора (ел башында бу сан 250 иде). Ел башы белән чагыштырганда эшсезлек дәрәҗәсе 0,26 процентка төште һәм ул 0,63 процент тәшкил итә.

Бүген ТР авыл хуҗалыгы министры Марат Әхмәтов Зәй районы басуларында язгы кыр эшләренең барышы белән танышты.Чәчүлек мәйданнарын вертолеттан карап чыкканнан соң, министр "Зәй шикәре" агрофирмасы "Чыбыклы" бүлекчәсенең көзге бодай басуында инвестор Илшат Фәрдиев, "АгроКөч " холдингы җитәкчелеге, авыл хуҗалыгы белгечләре, агрофирмалар, бүлекчәләр җитәкчеләре, авыл җирлекләре башлыклары белән киңәшмә үткәрде. Министрны район башлыгы Разиф Кәримов озатып йөрде.

Бүген хакимияттә Зәй районы Советы рәисе урынбасары В.Г. Акатьев, Зәй шәһәре Советы рәисе урынбасары Е.В. Недошивина катнашуында Зәй муниципаль районы Советы һәм Зәй шәһәр Советының бюджет-финанс, икътисади үсеш һәм муниципаль милек мәсьәләләре буенча эшләүче даими депутат комиссияләренең берләштерелгән утырышы булды. Утырышның көн тәртибенә куелган сораулар буенча Зәй муниципаль районы финанс-бюджет палатасы рәисе В. Э. Шакирҗанова чыгыш ясады.

Бүген Зоя Ивановна Пекина үзенең 90 яшьлек юбилеен билгеләп үтте. Ул төрле эшләрдә эшләп, лаеклы ялга Зәй ГРЭС ыннан китә. Тормыш иптәше белән 3 кыз - бала тәрбияләп үстергәннәр. Бүгенге көндә Зоя Ивановнаның 7 оныгы 11 оныкчыгы бар. Ветеранны юбилее белән котлауда Зәй шәһәре башлыгы урынбасары Е.В.Недошивина катнашты, Россия Президенты В. В.Путин исеменнән котлау открыткасы һәм район башлыгы Р.Г. Кәримов исеменнән бүләк тапшырды. Район мәдәният идарәсе артистлары юбилярны котлап җыр бүләк иттеләр.