ЯҢАЛЫКЛАР

1 нче мартта Зәйдә халыкны кабул итү оештырылачак. Очрашу «БЕРДӘМ РОССИЯ» сәяси партиясенең иҗтимагый кабул итү бүлмәсендә: Зәй шәһәре,Чапаев урамы,1 йортта (үзәк китапханә бинасы) узачак. Анда халыкны Татарстан Республикасы Дәүләт Советы депутаты И. Ю. Әминов , Пенсия фонды һәм халыкны социаль яклау идарәсе һәм дәүләт торак фонды вәкилләре кабул итәчәк. Алар социаль ипотека прграммасы, ана капиталы средстволарын куллану һәм гаиләдә туган беренче һәм икенче балалар өчен айлык түләүгә кагылышлы сорауларга җавап бирәчәкләр.Кабул итү вакыты: 14.00-15.00 кадәр. Алдан язылу өчен телефон: 8(85558) 7-30-94

24 нче февральдә Зәйнең спорт сәламәтләндерү үзәгендә 2004-2005, 2006-2007, 2008-2009 нчы елларда туган яшүсмерләр һәм кызлар арасында тхэквондо буенча I нче ачык турнир үтте. Анда Зәй һәм Яр Чаллы шәһәрләреннән 120 спортсмен катнашты. Турнирны тантаналы төстә район башлыгы Р.Г.Кәримов ачты һәм балаларга ярышларда җиңү теләде. Үз үлчәү берәмлекләрендә 2004-2006 елда туган яшүсмер һәм кызлар арасында Сагиров Артур, Хәбибрахманов Рафаэль, Дәүләтшин Данил, Оруджев Вадим, Миңнегалиев Рүзәл, Әхмәтҗанова Полина, Савицкая Лиана; 2007-2008 нче елларда туган яшүсмер һәм кызлар арасында Шәйхелов Дамир,Тиняков Тимур, Зиновьев Владислав, Сафин Рамзан, Шоринков Арсений, Әхмәдуллин Айдар, Кәбиров Данис, Хөсәенов Дамир; 2009-2010 елларда туган яшүсмерләр һәм кызлар арасында Хәбетдинов Дамир, Иванов Егор, Корнеев Артем, Шәйхетдинов Әмир, Секаев Артемий, Яковлев Ярослав, Мингалин Руслан, Большоков Әскәр, Хүҗин Әмир, Гыйляҗева Регина, Ивыгина Арина, Хәбибуллина Әминә, Сабирова Сафиналар җиңүче булды. Аларның тренер- укытучылары Л.И.Шәйгәрданова.

Бүген районыбызның Аксар авылы мәктәбендә милли көрәш буенча “Аксар батырлары” XXI ачык Республика турниры үткәрелә. Анда 2004 нче елгы һәм алардан кечерәк яшьтәге көрәшчеләр катнаша. Бил алышулар барлыгы 10 үлчәү авырлыгы буенча алып барылачак. Аксар - заманында атаклы көрәшчеләр үстергән авыл. Турнир быел да авылның көрәш ветераннары ярдәме белән оештырыла.

22 февральдә Зәй районының Югары Пәнәче һәм Бигеш авылы җирлекләрендә чираттагы халык җыеннары узды. Халык белән очрашуда Зәй муниципаль районы башлыгы урынбасары В.Г. Акатьев, район Башкарма комитеты җитәкчесе И.Ф.Хафизов, авыл хуҗалыгы һәм азык-төлек идарәсе башлыгы А.Н.Галиәхмәтовлар катнашты. Утырышларда узган елда авыл җирлекләрендә башкарылган эшләргә нәтиҗә ясалды һәм алдагы елга куелган планнар турында сөйләшү булды. Җыен башланганчы, Бигеш авылы халкы тамашачысы өчен “Сорнай” халык ансамбле һәм Татарстанның халык артисты Георгий Ибушев катнашында зур концерт программасы тәкъдим ителде. Георгий Ибушев күпчелек җырларны нәкъ менә якташ композиторыбыз Геннадий Максимов иҗатыннан башкарды. Авыл җирлеге башлыгы И.Р.Вәлиев Бигеш авылы халкы исеменнән “Сорнай” халык ансамбле һәм Татарстанның халык артисты Георгий Ибушевка рәхмәт белдерде.

Хөрмәтле зәйлеләр, ир-егетләребез, Россия армиясе һәм флоты сафындагылар, запастагы хәрбиләр! Сезне ихлас күңелдән Ватанны саклаучылар көне белән котлыйм. Безнең тормышта иң кыйммәтле нәрсәләр – тынычлык, иминлек һәм тотрыклылык. Ватанны саклаучылар көне һәрвакыт батырлык , фидакарьлек, намуслылык символы булды. Бу көнне без илебезне батырларча саклаган һәм саклаучыларны гына түгел, ә намуслы хезмәте белән илебез, республикабыз, районыбыз үсешенә өлеш кертүчеләрне дә зурлыйбыз. Без чын ир-егетләр һөнәре – Ватанны саклаучы хезмәтен сайлаучыларга олы хөрмәт белән карыйбыз. Кораллы Көчләр солдатлары һәм офицерлары, хәрби бәрелешләр һәм локаль сугышларда катнашучылар, махсус хезмәтләр хезмәткәрләре тыныч тормышның, дуслык һәм кешелеклелекнең нинди зур мәгънәгә ия булуын аеруча тирәнтен аңлыйлар. Календарьдагы бу дата ир-егетләренең һәр гаиләнең ышанычы һәм терәге булуы турында искәртә. Әлеге бәйрәмне гаиләләре белән бергә билгеләп үтүчеләрнең дә, шулай ук хәрби постта торучыларның да үз йортлары, гаиләләре, илебезнең ныклы сакчылары булуын телим. Бу аерым әһәмияткә ия көндә солдат һәм офицер улларын данлыклы хәрби традицияләрдә тәрбияләгән аналарга һәм хәрбиләр белән янәшәдә гаилә учагын саклаучы хатын-кызларыбызга зур рәхмәтемне белдерәм. Сезгә имин һәм якты көннәр, ныклы сәламәтлек, барлык эшләрегездә һәм башлангычларыгызда уңышлар, һәм гаилә бәхете телим. Зәй муниципаль районы башлыгы Р.Г.Кәримов

Зәйдә 23 февраль – Ватанны саклаучылар көне уңаеннан Азатлык китерүче солдат һәйкәле янында тантаналы митинг үтте. Анда район башлыгы урынбасары Валерий Акатьев, ветераннар советы рәисе Марсель Хуҗин чыгыш ясадылар.

22 февральдә хакимият бинасының кече залында “Мәгариф” өстенлекле милли проектын тормышка ашыру буенча муниципаль Совет утырышы узды. Утырышны муниципаль Совет рәисе, район башлыгы урынбасары В.Г.Акатьев ачты. Анда Зәй муниципаль районы Грантына дәгъва кылучы 7 нче төп гомүми белем бирү мәктәбе, Р.Ш.Фәрдиев исемендәге татар гимназиясе, Сарсаз-Баграж, Бигеш авылы мәктәпләре педагоглары һәм “Миләшкәй”, “Күкчәчәк” , “Салават күпере”, “Шатлык” балалар бакчасы тәрбиячеләренең чыгышы тыңланды.

21 февральдә район башлыгы Р.Г.Кәримов,аның урынбасары В.Г.Акатьев, район авыл хуҗалыгы һәм азык- төлек идарәсе башлыгы А.Н.Галиәхмәтов, предприятие һәм оешма җитәкчеләре, җаваплы хезмәткәрләр һәм белгечләр катнашында Кадер,Түбән Биш һәм Дурт- Мунча авылы җирлекләрендә авыл җыеннары узды. Җыенда авыл җирлекләренең 2017 елдагы социаль- икътисади үсеш нәтиҗәләренә йомгак ясалды һәм 2018 елга бурычлар билгеләнде. Авыл җирлеге тормышында нәтиҗәле эшләүчеләргә җирлек башлыкларының Рәхмәт хатлары тапшырылды. Мондый очрашулар авыл халкын борчыган барлык төр сорауларга турыдан- туры җавап алу мөмкинлеге бирә.

21 февральдә Зәй шәһәренең 1 мәктәбендә чираттагы «Гаилә дәресе» узды. Аны гражданлык торышы актларын теркәү бүлеге баш белгече Гөлнар Гизатуллина “Гаилә – бүген һәм иртәгә” дигән темага үткәрде.

Кичә Якутиядә уздырылган «Биир күн» I төбәкара интерактив этно-поп жанрындагы заманча җыр бәйгесенең нәтиҗәсе билгеле булды. Конкурсның финалында Россиянең 11 төбәгеннән сайлап алынган талантлы башкаручылар арасында Татарстан данын яклаган Зәй егете Айдар Сөләйманов Гран-прига ия булды. Айдар Сөләйманов мәртәбәле бәйгедә татар халкы җырларын һәм композиторларыбыз әсәрләрен – “Илче Бага”, “Рәйхан”, Ренат Харис белән Резеда Әхиярованың “Зәңгәр томан”, Ренат Харис белән Эльмир Низамовның “Атлар чаба” җырларын югары осталыкта башкарып уңышка иреште.