ЯҢАЛЫКЛАР

Бүген Зәй шәһәрендә яшәүче хезмәт ветераны Николай Павловичны Новиков район башлыгы Р.Г.Кәримов исеменнән 90 яшьлек юбилее белән котлау кабул итте. Чарада Советның аппарат җитәкчесе Н.Л.Шакирова, район ветераннар Советы рәисе М.С. Хүҗин, “Яңа шәһәр” территориаль иьтимагый үзидарә рәисе Т.В.Тыткина һәм мәдәният йортының автоклуб хезмәткәрләре катнашты.

Бүген район Советы утырышы күчмә формада үтте.Сессиядә катнашучылар Ф.П.Симашев исемендәге балалар һәм яшүсмерләр спорт мәктәбендә булдылар, 24 тораклы йортны карадылар, юл үткәргеч янында булдылар. Утырышта катнашучылар “Зәй шикәре” ААҖ объектларында булып, андагы эш тәртибе белән якыннан таныштылар.Район Советы утырышы заводның актлар залында дәвам итте. Көн тәртибенә куелган барлык сораулар каралды. Район башлыгы Р.Г.Кәримов сессия утырышына нәтиҗә ясады.

Бүген Татарстан Республикасы Авыл хуҗалыгы һәм азык-төлек министрлыгында «Татарстан Республикасы агросәнәгать комплексының иң яхшы белгече» республика конкурссында җиңүчеләрне бүләкләү тантанасы узды. Чарада ветеринария табиблары, инженер,агроном,икътисадчы, хисапчы һәм кадрлар бүлеге хезмәткәрләре катнашты. Конкурста җиңүчеләргә грантларны Татарстан Республикасы Авыл хуҗалыгы һәм азык-төлек министры урынбасарлары Николай Титов, Нәҗип Хаҗипов, Илдус Габдрахманов, Тәлгать Таһирҗанов, Марат Җәббаров һәм Татарстан Республикасы Министрлар Кабинетының Баш ветеринария идарәсе башлыгы Алмаз Хисаметдиновлар тапшырды.

16 декабрь көнне сәгать 10. 00 дә Зәй хакимияте бинасында "Тирә- юньгә зыян китерә торган объектларны дәүләт исәбенә кую" темасына багышланган укулар үтәчәк.

«Космос» яшьләр үзәгендә төзекләндерү эшләре кызу темплар белән бара. Бинаның эчке ягы күзгә күренеп үзгәрә.Район башлыгы урынбасары В.Г.Акатьев һәм башкарма комитет җитәкчесе урынбасары В.А.Чапков катнашуында үткән чираттагы атналык киңәшмәдә эш темплары, аның сыйфаты турында очрашып сөйләшү төзекләндерелүче объектның үзендә үтте.

Бүген район башлыгы урынбасары В.Г.Акатьев «Энергетик» мәдәният йортында төзекләндерү эшләренең барышын контрольдә тоту мәсьәләләре буенча чираттагы киңәшмәне үткәрде. Киңәшмә барышында эшләнәсе эшләрне тизләтү белән беррәттән, эшнең сыйфатлы булуына да ныклы игътибар итәргә кирәклеге тагын бер кат ассызыкланды.

Бүген район башлыгы урынбасары В.Г.Акатьев, башкарма комитет җитәкчесе урынбасары Н.А.Нифатов шәһәрнең барлык подряд оешмалары белән берлектә шәһәр урамнары һәм йорт яны территорияләрен карап чыктылар. Тикшерү барышында, «Благострой» ҖЧШ нең һәм шәхси милекчеләрдә эшләүчеләрнең урамнарны кардан чистартуда эзлекле эшләве ачыкланды.

Үткән ноябрь аенда Зәй шәһәренең ЗАГС бүлегендә 51 сабый теркәлде: 26 малай һәм 25 кыз. Иң кечкенә бала 1790, ә иң зуры – 4310 грамм. Иң яшь анага – 20, иң өлкән анага 39 яшь. Ноябрь аенда иң популяр исемнәр Арсьан, Данис, Анастасия. Сирәк очрый торган исемнәр Илона, Устина, Вильдана, Матфей. Шул ук вакыт эчендә ЗАГС бүлегендә 17 пар никахларын рәсми рәвештә теркәгәннәр. Иң яшь каләш белән кияүгә 18 һәм 21 ел, иң олы кияүгә – 59, каләшкә – 63 яшь.

Торак- коммуналь хуҗалыгы иң катлаулы һәм җаваплы өлкәләрнең берсе. Яңа технологияләр, программалар, энергия саклау технологияләре бу өлкәгә зур тизлек белән үтеп керә. Халыкка күрсәтелә торган хезмәтләр сыйфатлы булырга тиеш. Район башлыгы Р.Г.Кәримов җитәкчеләргә бу мәсьәләләрне җитди контрольдә тотарга кирәклеге хакында һәрдаим искәртеп тора. Подъездларда үткәрелгән төзекләндерү эшләренең торышы, йорт яннарындагы тәртип , җылылык һәм су торбаларының эшләве һәм башка күп санлы мәсьәләләр берсе дә читтә калмады.

Һәр сишәмбе көнне район башлыгы Р.Г.Кәримов район бүлекчәләрендә булып, эш торышы белән якыннан таныша. Бу чарада авыл хуҗалыгы идарәсе башлыгы А.Н.Галиәхмәтов,бүлекчә җитәкчеләре һәм белгечләре катнаша. Бу атнада район җитәкчесе “Нива” ҖЧШ, “Восток” агрофирмасы, аның «Үрнәк»һәм «Мәлем» бүлекчәләре, «Игенче», «Тукай» бүлекчәләре, «Зәй»агрофирмасының «Ялкын», «Нур», «Шепкә», «Зәй шикәре»агрофирмасының «Заман», «Сәрәпәле», «Сәвәләй», «Родина» һәм башка бүлекчәләрендә булырга өлгерде.