ЯҢАЛЫКЛАР

Сталинград сугышында Җиңүгә 75 ел тулу һәм эзтабарлар хәрәкәте оешуга 50 ел тулу уңаеннан 1 февральдән Татарстан Республикасы буенча “Хәтер маршы – 2018” старт алды. Шул уңайдан бүген Зәйнең “Гвардия” һәм “Форпост” эзтабарлар отрядлары активистлары , шәһәрнең 3нче һәм 4нче мәктәп укучылары митингта катнашып, Азатлык китерүче солдат һәйкәленә чәчәкләр салдылар.

Зәй муниципаль районы Советы һәм Башкарма комитеты “Зәй офыклары” газетасы ветераны, танылган журналист, Россия һәм Татарстан Журналистлар берлекләре әгъзасы Вәсимә Мөхәммәт кызы Рәхмәтуллинаның вакытсыз арабыздан китүе уңаеннан якыннарының, туганнарының, хезмәттәшләренең авыр кайгысын уртаклаша.

Районыбыз мәдәният учакларында якташыбыз, язучы Аяз Гыйләҗевнең тууына 90 ел тулуга багышланган чаралар үткәрелә. Үзәк китапханәнең татар бүлегендә “Аяз Гыйләҗев-заман таләп иткән язучы” дип аталган күргәзмә янында әдәби сәгать үтте. Китап укучылар язучының биографиясе, әсәрләре белән таныштылар. Үзәк китапханәнең фоесында көнозын Аяз Гыйләҗевның иҗатына һәм тормышына багышланган “Киләчәк буынга” дип аталган видеопрезентация күрсәтелде.

21 гыйнвар көнне «Энергетик» мәдәният сараенда якташыбыз, Татарстанның халык артисты, Яр Чаллы керәшен җәмгыяте җитәкчесе Виталий Агапов җитәкчелегендәге “Керәшеннәр җырыу әйтә” концерт-фестивале аншлаг белән үтте. Бөтен республикадан җыелган керәшен җырчылары бер сәхнәдә чыгыш ясады.

Узган ялларда Югары Лоҗы авылында яшәүче Миннехаят Ахунҗан кызы Дәүләтшина 90 яшьлек юбилеен билгеләп үтте. Аны гомер бәйрәме белән тәбрикләргә район башлыгы урынбасары Валерий Акатьев, Бигеш авыл җирлеге башлыгы Илгиз Вәлиев, автоклуб хезмәткәрләре килде.

Бүген Зәй православие христианнары "Кач ману” бәйрәмен билгеләп үттеләр. Исегезгә төшерәбез, православие динендәгеләргә уңайлы булсын өчен узган ел Зәйне әйләнеп чыгу юлында район башлыгы Рәзиф Кәримов инициативасы белән "Изге Чишмә” төзекләндерелгән иде.

Бүген халыкны эш белән тәэмин итү үзәгендә район башлыгы Р.Г. Кәримов эшсез гражданнар белән очрашты. Чарада шулай ук шәһәр прокуроры Р.Р. Кәримов, шәһәр һәм район хәрби комиссары А.Ф. Әгъләмҗанов, Зәй районы Пенсия фонды идарәсенең пенсия билгеләү һәм яңадан исәпләү бүлеге башлыгы Л.Р. Хәсәнова һәм эш бирүчеләр вәкилләре: "СМП-Нефтегаз» АҖ, «КАМАЗ» кою заводы, «Таттелеком» АҖ, «Ялта-Зәй» спорт әзерлеге үзәге коммерцияле булмаган спорт учреждениесе, «Мефро уилз Руссиа Завод Заинск» ҖЧҖ, «Зәй урманчылыгы» ДКУ катнашты.

Бүген хакимиятнең кече залында район башлыгы Р.Г. Кәримов иҗтимагый һәм милли - мәдәни оешмалар җитәкчеләре белән очрашты.

9 нче гыйнвар көнне шәһәребезнең “Пирамида” кафесында “Шатлык” халыкка комплекслы социаль ярдәм күрсәтү үзәгендә исәптә торучы, аз тәэмин ителгән гаиләләрдә тәрбияләнүче балалар өчен Раштуа бәйрәме уздырылды.

Кыш бабайдан һәр бала могҗиза көтә. Физик мөмкинлекләре чикле булган сабыйлар Яңа елны аеруча көтеп ала. Бәйрәм якынлашкан көннәрдә Зәй муниципаль районының “Шатлык” халыкка комплекслы социаль ярдәм күрсәтү үзәгенең гаилә һәм балалар белән эшләү бүлеге белгечләре, “Волонтерлар” ирекле хәрәкәте белән берлектә, физик мөмкинлекләре чикләнгән балалар өендә кунакта булдылар, аларга төрле тәм – томнар тапшырдылар. Сабыйларны әлеге бүләкләр белән Россия Федерациясе Дәүләт Думасы депутаты Айрат Нәҗип улы Хәйруллин сөендерде.Кыш бабай - Ибраһимов Рамис Рифкать улы һәм Кар кызы – Санникова Ангелина Евгеньевна инвалид балаларны Яңа ел белән тәбрикләделәр. Волонтёрлар биш бала – Адилә Гиззәтуллина, Виктория Чулкова, Арсения Мустафина, Милена Алиева, Ильмира Фәйзрахмановаларның өйләрендә булдылар, аларга кечкенә генә бәйрәм оештырдылар. Күчтәнәчләргә чын күңелдән шатланган балаларын күреп, әти-әниләр дә сөенде. «Сабыйларның самими елмаюыннан үзебезнең дә күңелләргә рәхәтлек иңә», – ди һәр ел саен әлеге игелек чарасында катнашучы волонтерлар. Бу көнне волонтёрлар балаларның авыртуларын беразга гына булса да оныттырып тордылар, сабыйларга яхшы кәеф бүләк иттеләр.