ЯҢАЛЫКЛАР

Хөрмәтле зәйлеләр һәм шәһәребез кунаклары! Сезне ихлас күңелдән Халыклар бердәмлеге көне һәм Татарстан Конституциясе көне белән котлыйм. Гражданлык теләктәшлеге һәм бердәмлек традицияләре – безнең җәмгыятебезнең һәм дәүләтебезнең үсеш нигезләре. Бары тик бергә һәм бердәм булганда гына без халыкка озак еллар хезмәт итүче, тормышны яхшы якка үзгәртүче проектларны тормышка ашыра алабыз, дәүләтебез үсеше перспективаларын ача алабыз. Татарстан Республикасы Конституциясе күпмилләтле Татарстан халкының тарихы бердәмлеген беркетте. Моннан 25 ел элек кабул ителгән Конституция безнең бәйсезлегебезнең ныклы нигезе, Татарстанның югары халыкара дәрәҗәсе һәм уңышлы үсеш гаранты булып тора. Татарстанлылар, Республика Конституциясенә тугрылык саклап, Татарстан Республикасы Президенты җитәкчелегендә республиканың бөтенлеге һәм мәнфәгатьләре сагында торырга әзер һәм сәләтле булуларын күрсәтәләр. Конституция, җәмгыятебезнең төп кыйммәтләре буларак, иҗтимагый-сәяси бердәмлек, теләктәшлек һәм тотрыклылыкны ныгытты. Конституциядә каралган Татарстан Республикасы үсешенең өстенлекле проектлары ирекле үсеш, куркынычсызлык һәм иминлек өчен тиешле шартлар тудыруга юнәлдерелгән. Халыклар бердәмлеге көне һәм Татарстан Конституциясе көне гражданнарны берләштерүгә хезмәт итә, индивидуализмнан китәргә, җәмгыятебез алдында җаваплылыкны үстерүгә булыша. Әлеге бәйрәмнәр бүген Ватаныбызның иминлеге һәм үсеше, иреге хакына төрле буыннарны, халык һәм милләтләрне, социаль катламнарны, хезмәт ияләрен берләштерәүгә юнәлдерелгән. Хөрмәтле зәйлеләр! Сезнең өчен бу бәйрәм көннәре безнең иксез-чиксез зур илебезнең бер халкы булуыбызны искәртсен. Сезгә чын күңелдән сәламәтлек, бәхет, иминлек һәм яңа хезмәт казанышлары телим. Зәй муниципаль районы башлыгы Р.Г.Кәримов.

Бүген Үзәк китапханәдә язучы якташыбыз, Рабит Мөхлис улы Батулла белән очрашу үтте. Очрашуда Зәй районы башлыгы урынбасары В.Г.Акатьев, район ветераннар Советы рәисе М.С.Хүҗин да катнашты. “Буыннан буынга асыл хәзинә итеп тапшырыла торган, заман җилләре дә ала алмый, гасырлар үтсә дә югалмый торган, кешелек тарихы өчен бик кадерле булган кыйммәтләр бар. Юк, асылташлар түгел. Бәясен берни белән дә үлчәп булмый торган, еллар үткән саен кыйммәте арта гына барган бу кыйммәт – әдәби хәзинә”. 12 октябрь көнне Зәй үзәк китапханәсендә үткәрелгән, олы йөрәкле, гаҗәеп тә талантлы, киң күңелле язучыбыз, якташыбыз, драматург, публицист, җәмәгать эшлеклесе Рабит Мөхлис улы Батулла белән, очрашу кичәсе нәкъ тә менә шушы асыл сүзләр белән башланып китте. Очрашу кичәсе ике өлештән торды. Беренче өлеш якташыбыз Рабит Батуллага багышланды. Аның балачагы, мәктәп, университет чоры, иҗаты, уңышларын чагылдырган презентациягә нигезләнеп, үзәк китапханә библиографы Ләйлә Валиуллина очрашуны алып барды. Икенче өлештә Рабит ага Батулла иҗаты турында сөйләде. Китап сөюче дуслар, язучыга, үзләренең кызыксындырган сорауларны бирделәр. Рабит ага Батулла һәр сорауга тулы, аңлаешлы җаваплар кайтарды. Шәһәребезнең шагыйре Мәсләхетдин Кашапов, Рабит Батуллага багышланган шигырен укыды. Бу очрашу күңелдә онытылмаслык тәэсир калдырды.

Хөрмәтле авыл хуҗалыгы һәм эшкәртү сәнәгате хезмәткәрләре, ветераннар!

 

Сезне чын күңелдән Авыл хуҗалыгы һәм эшкәртү сәнәгате хезмәткәрләре көне белән котлыйм.

Халыкара өлкәннәр көне уңаеннан иң изге теләкләребезне кабул итеп алыгыз! 1 октябрь – күңел кылларын тибрәтүче, мәрхәмәтле гамәлләргә өндәүче, өлкән буын кешеләренә хөрмәтебезне күрсәтү көне. Бу көн - безнең сезгә булган хисләребезне җиткерү, шәһәр-районыбызда, гомумән, бөтен илебездә сез башкарган эш-гамәлләргә, балаларыгыз-оныкларыгыз өчен кылган изгелекләргә олы рәхмәтне белдерүгә тагын бер сәбәп тә. Әлеге бәйрәм зирәклек чыганагын, тормыш тәҗрибәсен, фидакарьлек һәм әхлаклылыкны, Ватаныбызга эчкерсез хезмәт итүне дә гәүдәләндерә. Нәкъ менә авыр мизгелләрдә киңәш сорап без сезгә мөрәҗәгать итәбез, нәкъ менә сезнең белән шатлык-уңышларыбызны уртаклашабыз. Сезнең куллар белән күпмилләтле халкыбызның тарихы барлыкка килгән, туган шәһәребез, районыбыз, гомумән, илебезнең даны сезнең фидакарь хезмәтегез бәрабәренә арткан. Барысы өчен дә зур рәхмәт сезгә! Тормышны яратуыгыз, оптимистик рухта яшәвегез, илнең киләчәгенә ышаныч белән каравыгыз өчен аерым рәхмәт. Бу сыйфатларны сез – өлкән буын кешеләре иң катлаулы елларда да югалтмадыгыз, бездә дә үз-үзебезгә ышаныч тәрбияләдегез, шуның нәтиҗәсендә төрле тормыш сынауларын җиңәрлек буын сезнең сафларны алыштыра килә. Республика һәм район җитәкчелеге ветераннарга һәм пенсионерларга төрле проблемаларны чишүдә ярдәм итү өчен барысын да эшли. Әмма нинди генә матди ярдәм дә якыннарның, дусларның мәхәббәтен, әйләнә-тирәдәгеләрнең хөрмәт белән каравын алыштыра алмый. Ихтирам, игътибар, хөрмәт, мәхәббәт дигән бу эчкерсез хисләрне сезгә һәрвакыт тоярга язсын. Шунысы куанычлы, әле күпләрегез сезнең - бүген дә иҗтимагый оешмалар әгъзалары, яшьләргә патриотик тәрбия бирүдә актив катнашучылар, иҗат, спорт белән янучылар. Без өлкән буын кешеләренең ирешкән уңышлары белән горурланабыз, сездән үрнәк алып яшибез, эшлибез. Сезнең гражданлык активлыгыгызга, тормыш позициягезгә сокланабыз. Хөрмәтле ветераннар! Сезгә ныклы сәламәтлек, тынычлык, уңышлар телим! Һәр көнегез туганнарыгыз, якыннарыгызның җан җылысын тоеп үтсен! Бәйрәм белән сезне! Р.Г. Кәримов, муниципаль район башлыгы

Үзәк китапханәнең татар бүлеге, көзге уңышка багышланган, “Алтын көз” дип исемләнгән бәйрәм үткәрде. Чарага Р.Фәрдиев исемендәге Татар гимназиясенең 5 класс укучылары килде. Китапханә хезмәткәрләре чарага килгән балаларны Сөмбелә бәйрәме белән котладылар, бәйрәмнең килеп чыгу тарихы белән таныштырдылар, китап күргәзмәсе янында әңгәмә үткәрделәр. Укучылар төрле конкурсларда бик теләп катнаштылар: табышмакларга җавап эзләделәр, яшелчәләргә презентация ясадылар, көз турында мәкальләр һәм әйтемнәрне искә төшерделәр.

Бүген Зәй муниципаль районы башлыгы урынбасары В.Г.Акатьев Зәй шәһәрендә яшәүче сугыш ветераны Казанкина Любовь Федоровнаны 90 яшьлек юбилее белән котлады. Чарада автоклуб хезмәткәрләре дә катнашты.

Зәйдә Татарстан Республикасы “Авыл яшьләре” Х җәйге спорт уеннары старт алды. Ярышларда республиканың 43 районыннан авыл спортчылары катнаша. Шуларның берсе, Мамадыш районының яшь егет-кызларын, Зәй китапханәсе хезмәткәрләре каршы алды. Алар өчен “На вылет!” дигән спорт - яшьләр уены үткәрелде. Уен-тамаша берничә сынаудан торды. Егетләр һәм кызлар үзләрен бик актив, спорт өлкәсендә белгеч булулары ягыннан күрсәттеләр. Һәрбер уенда 2 кеше катнашты, җиңгән уенчы егет-кызлар истәлекле бүләккә ия булдылар. Иң чыдам яшь спортчы төп бүләккә, китапханә символы “Ябалак”сынына, лаек булды.

Яшь буынга сәламәт яшәү рәвешен һәм физик культураны пропагандалау максатыннан Ялчыгол скверында “Тату гаилә” балалар бакчасында тәрбияләнүчеләр белән Үзәк балалар китапханәсе хезмәткәрләре “Сәламәт, көчле, кыю бул” дип исемләнгән спорт бәйрәме уздырдылар. Сәламәтлек безгә табигать тарафыннан бирелгән зур байлык. Спорт белән шөгыльләнү сәламәтлеккә зур ярдәм итә. Шуңа күрә иртәнге зарядка ясау, чаңгы шуу, саф һавада булу , йөгерү-һәркемнең тормыш кагыйдәсенә әверелергә тиеш. Спорт бәйрәменә җыелган балалар бик теләп төрле уеннарда катнаштылар. Командаларга бүленеп уйналган “Көңгерә”, “Балык тотам”, “Файдалы – зыянлы” конкурслары, бергәләшеп зарядка ясау, җырлы – биюле уеннар да сабыйларның күңеленә хуш килде. Әлбәттә “Сәламәт булып үс” китап күргәзмәсендәге эчтәлекле, заманча, матур китаплар да игътибардан читтә калмады. Очрашу ахырында балаларга асфальтта акбур белән сәламәтлек символын ясау тәкъдим ителде һәм алар бу биремне дә уңышлы үтәделәр – балаларның күп өлеше сәламәтлек символы итеп кояшны сайлаган, һәм бу дөрестер дә, чөнки кояш ул яхшы кәеф, яктылык, җылылык һәм сәламәтлек чыганагы. Балаларыбыз сәламәт һәм бәхетле булсыннар!

Быел районыбызда язучы Сөббух Рәфыйков исемендәге премиягә билгеле рәссамнарыбыз Виктор Хрулев һәм Сергей Цыганов лаек булды. Лауреатларны язучы исемен йөрткән үзәк китапханәдә тантаналы төстә район башлыгы урынбасары В.Г. Акатьев, район җитәкчелеге, иҗатка гашыйк зәйлеләр тәбрикләде. Виктор Хрулев -Татарстан һәм Россия Рәссамнар берлеге әгъзасы. Аның 40 еллык иҗатын санына чыгып бетерә алмаслык пейзаж, натюрморт, портретлар, иконалар бизи. Сергей Цыганов исә Татарстан Рәссамнар берлеге әгъзасы һәм төрле дәрәҗә иҗат күргәзмәләрендә аның эшләре югары бәя алып килә. Тәбрикләүләр “Азаль” вокаль-хореография ансамбле һәм җирле иҗат шәхесләре чыгышы белән аралашып барды.

Язучы Сөббух Рәфыйковның соңгы 14 ел гомере, иҗаты Зәй җире белән тыгыз бәйләнештә була. Биредә үзен кабул иткән, яраткан зәйлеләргә язучы үз әсәрләрендә тирән рәхмәтле булуын белдерә. Бүген Сөббух Рәфыйковка исән булса 104 яшь тулган булыр иде. Күркәм традицияне дәвам итеп, Сөббух Рәфыйков исемендәге үзәк китапханә коллективы инициативасы белән, бүген аның каберенә барып искә алу чарасы үткәрелде. Анда хакимиятнең милли мәсьәләләр, иҗтимагый оешмалар белән эшләүче бүлеге баш белгече Алсу Хисмәтуллина, ветераннар Советы рәисе Марсель Хуҗин, үзәк китапханәләр челтәре директоры Чулпан Шәйхиева, Кафил хәзрәт Хисамиев, "Зәй офыклары" газетасы журналистлары килде. Үзәк китапханә хезмәткәрләре тарафыннан даими тәртиптә тотылучы каберлеккә кызыл канәфер чәчәкләре салынды.