ЯҢАЛЫКЛАР

Зәйдә керәшен җәмгыятенең чираттагы утырышы үтте. Анда Зәй районы башлыгы урынбасары В.Г.Акатьев катнашты. Көн тәртибендә җәмгыятьнең агымдагы елга билгеләнгән чаралар планы үтәлеше, якын көннәрдә хәл итәргә тиешле мәсьәләләр тикшерелде. Очрашу вакытында шәһәрдә керәшен чиркәве төзелешен башлау турында да сөйләшү булды. Төзелеш урынына әлегә вагончыклар кую бара. Чиркәү төзелеше өчен хисап счеты ачылган. Тиздән ул халыкка җиткереләчәк.

10 нчы апрельдә, Зәйнең «Энергетик”лар мәдәният йорты каршында яңа сыерчык оялары ясау буенча киң масштаблы табигатьне саклау акциясенә нәтиҗә ясалды. Шәһәр һәм район мәктәпләрендә укучы һәм балалар бакчаларында тәрбияләнүче балалар 200 дән артык кош-корт оясы ясадылар. Берничә кош оясы шәһәр хакимияте бинасы каршысында урнашкан скверга куелды. Калган ояларны оешма һәм предприятияләр шәһәр ял итү парклары һәм скверларына урнаштырдылар. Акциядә җиңүчеләргә бүләкләрне район Башкарма комитеты башлыгы И.Ф.Хафизов тапшырды.

Бүген район башлыгы Разиф Кәримов “Агрокөч” АҖ һәм “Агрокөч-Төркем” ЯАҖ җитәкчеләре, белгечләре, район инженерлар хезмәте белән берлектә авыл хуҗалыгы техникасы әзерлеген тикшерергә чыкты. Игътибар үзәгендә хуҗалыкларның машина-трактор паркы, хезмәтне саклау һәм орлыклык материал торышы. Тикшерү барышында Разиф Кәримов механизаторлар белән дә аралаша, аларның киңәш-гозерләрен тыңлый, хезмәткә түләү, кызыксындыру чаралары турында аңлата.

9 апрель көнне Югары Нәлим төп гомуми белем мәктәбендә Зәй муниципаль районы татар теле һәм әдәбияты укытучыларының «ФДББС шартларында татар теле һәм әдәбиятыннан заманча дәрес» темасына методик семинары үтте.

Зәй мәшгульлек үзәге белгечләре сыйныф җитәкчеләре семинарында катнашты. Көн тәртибендә каникуллар вакытында укучыларның җәйге ялын оештыру һәм аларны нәтиҗәле сәламәтләндерү мәсьәләсе каралды.

Быел да көзге культураларны тукландыруга беренчеләрдән булып "Нива" җаваплылыгы чикләнгән ширкәте кереште. Эшне күпьеллыклар чәчелгән мәйданнардан башладылар. Кыр эшләренә старт бирүдә район башлыгы Разиф Кәримов, “Агрокөч төркем” АҖ генераль директоры урынбасары Владимир Егоров, авыл хуҗалыгы һәм азык-төлек идарәсе башлыгы Атлас Галиәхмәтов, идарә белгечләре, агрофирма һәм бүлекчә җитәкчеләре, агрономнар, әлеге тармак ветераннары катнашты.

«Миләшкәй» балалар бакчасында «Чиякәй» исемле мәктәпкә әзерлек төркеме балалары һәм 5 гомуми төп белем мәктәбенең 1 сыйныф укучылары арасында шахмат буенча иптәшләрчә матч үткәрелде. Турнир өч этапта 17 шахмат тактасы белән узды. Һәр этапта да җиңүчеләр билгеләнде.

7 нче апрельдә район мәдәният йортында яшьләр иҗади фестиваленең финал этабы узды. Фестиваль сәламәт тормыш алып бару, җәмгыятьтә күңелсез  күренешләрне булдырмау, яшьләрнең иҗади активлыгын арттыру максатында оештырыла. Фестивальдә 7 команда Бигеш, Югары Баграж, Яңа Спас, Якты Күл,Сәвәләй,Сармашбаш һәм район мәдәният йортлары катнашты.

Хөрмәтле православие динен тотучылар! Сезне чын күңелдән якты һәм куанычлы бәйрәм – изге Пасха белән котлыйм. Әлеге якты бәйрәм яңарыш һәм тынычлыкны гәүдәләндерә, һәр кешенең җиргә яхшы гамәлләр кылырга килүен искәртә, дус-тату яшәргә, намус белән эшләргә чакыра. Муниципаль районда төрле милләт һәм дин вәкилләре үзара дус-тату яши, Пасха бәйрәме дә дуслык-татулык, иминлек, бер-береңә хөрмәт шартларында уза. Әлеге якты бәйрәм һәр йортка иминлек, бәхет һәм уңышлар алып килсен, ә җылы язгы көннәр игелекле эшләргә рухландырсын һәм яңа биеклекләргә ирешү өчен көч өстәсен! Чын күңелемнән язгы Пасха көннәренең туганнарыгыз һәм якыннарыгыз белән аралашу шатлыгы аша йөрәкләрегезне җылытуын, сәламәтлек, иминлек, барлык башлангычларыгызда уңышлар телим. Разиф Кәримов, муниципаль район башлыгы.

6 апрель көнне 6 мәктәп базасында узган киңәшмәдә Татарстан Республикасы мәгариф министрлыгы тарафыннан район белем бирү йортларында үткәрелгән планлы, киң масштаблы тикшерү-күзәтү эшләренә йомгак ясалды.