Зәй районы авыл хезмәтчәннәре язгы кыр эшләрен башлап җибәрде

Быел да көзге культураларны тукландыруга беренчеләрдән булып "Нива" җаваплылыгы чикләнгән ширкәте кереште. Эшне күпьеллыклар чәчелгән мәйданнардан башладылар. Кыр эшләренә старт бирүдә район башлыгы Разиф Кәримов, “Агрокөч төркем” АҖ генераль директоры урынбасары Владимир Егоров, авыл хуҗалыгы һәм азык-төлек идарәсе башлыгы Атлас Галиәхмәтов, идарә белгечләре, агрофирма һәм бүлекчә җитәкчеләре, агрономнар, әлеге тармак ветераннары катнашты. Район башлыгы Разиф Кәримовның чыгышы, басу өстендә яңгыраган изге догалар авыл хезмәтчәннәрен узган елгы югары күрсәткечләргә ирешүгә рухландырды. Кырга аммиак селитрасын «Барс» үзйөрешле ашлама сибү агрегаты тарата, ашлама белән тәэмин итүдә өзеклекләр юк. Барлык агрофирмаларда да җитәрлек күләмдә югары сыйфатлы чәчүлек орлык әзерләп куелган.