Зәйдә мәгариф учреждениеләрен планлы тикшерү эшенә йомгак ясалды

6 апрель көнне 6 мәктәп базасында узган киңәшмәдә Татарстан Республикасы мәгариф министрлыгы тарафыннан район белем бирү йортларында үткәрелгән планлы, киң масштаблы тикшерү-күзәтү эшләренә йомгак ясалды. Төп доклад белән чыккан мәгариф министры урынбасары Гөлнара Габдрахманова Зәй мәгарифе системасына бәя биреп, уңай якларны да, җитешсезлекләрне дә атады. Райондагы белем бирү сыйфатын, тудырылучы шартларны күзәтүгә югары квалификацияле 35 педагог - эксперт җәлеп ителде. Алар районындагы 52 мәгариф оешмасы: 22 мәктәп, 23 балалар бакчасы, 6 өстәмә белем бирү оешмасы һәм политехник колледж эшчәнлеген тикшерделәр. Экспертлар 927 дәрестә күзәтү алып бардылар. Киңәшмә эшендә район башлыгы Р.Г. Кәримов, башкарма комитет җитәкчесе И.Ф. Хафизов, мәгариф идарәсе башлыгы С.А. Кузнецов катнаштылар.