Зәйдә кыска вакытлы ялга кайткан хәрбиләр белән чираттагы очрашу узды

Бүген район башлыгы Разиф Кәримов махсус хәрби операция зонасыннан ялга кайткан егетләр белән очрашты. Очрашуда район башлыгы урынбасары Петр Уразайкин, район башкарма комитеты җитәкчесе Эмиль Галиев, «Ватанны саклаучылар» фондының Зәйдәге социаль координаторы Сергей Хватков, хәрбиләрнең эш урыннарыннан җитәкчеләр һәм авыл җирлекләре башлыклары, махсус хәрби операциядә катнашучыларга һәм аларның гаиләләренә ярдәм мәсьәләләре буенча эшче төркем әгъзалары катнашты. Иң элек егетләр “Энергетик” мәдәният сарае фойесында “Зәй муниципаль районының 2023 елдагы мөһим вакыйгалары” дигән күргәзмә белән таныштылар. Очрашу күңелле мизгелдән – бүләкләүдән башланды. Хәрби бурычын лаеклы һәм батырларча үтәгәне өчен Зәйнең ике егетенә район башлыгы исеменә Рәхмәт хаты килде. Аларны Разиф Галиевич берсенең әтисе - Әлфис Мөхәммәдиевич һәм икенчесенең тормыш иптәше - Ильнара Альбертовнага тапшырды. Шулай ук махсус хәрби операция зонасында булган хәрбиләргә һәрьяклап ярдәм күрсәткәннәре өчен “Тимер” батальоны командованиесе һәм 29657нче хәрби часть командирының Рәхмәт хатлары белән район башлыгы Разиф Кәримов һәм аның урынбасары Петр Уразайкин бүләкләнде. “Бу - безнең зәйлеләрнең уртак эше”, - дип кабул итеп алды Рәхмәт хатын Разиф Галиевич. Разиф Кәримов егетләрне райондагы эшләрнең торышы белән таныштырды, очрашуга килүләре өчен рәхмәт белдерде. -Безнең чакыруны кабул итеп, очрашуга килгәнегез өчен зур рәхмәт. Сезнең белән күрешү безнең өчен бик кадерле, без сезнең белән горурланабыз. Зәй егетләре махсус хәрби операция зонасында хәрби бурычларын намус белән батырларча үти. Алар итагатьле, тыйнак булулары белән дә аерылып торалар. Иң мөһиме — үзегезне саклагыз, без сезнең җиңү белән кайтуыгызны түземсезлек белән көтәбез, — диде Разиф Галиевич. Махсус хәрби операциядә һәлак булган Зәй егетләре бер минут тынлык белән искә алынды. Очрашу җылы, рәсми булмаган шартларда узды. Чәй өстәле артында хәрбиләр үз хәлләре турында сөйләде, гуманитар ярдәм күрсәткән, аларга рухи һәм матди яктан ярдәм иткән һәркемгә рәхмәт сүзләрен белдерделәр. Очрашу күчтәнәче итеп, барысына да азык-төлек пакетлары бирелде.