Зәй районы махсус хәрби операциядә һәлак булган сугышчыны соңгы юлга озатты

Бүген Зәй районы махсус хәрби операциядә һәлак булган Урта Пәнәче авылы егете ефрейтор Жаров Юрий Анатольевич белән хушлашты. Матәм чарасы «Энергетик» мәдәният йортында узды. Район башлыгы Р.Г. Кәримов каһарманның әтисенә, туганнарына, якыннарына, барлык зәйлеләргә кайгы уртаклашу сүзләре белән мөрәҗәгать итте. "Бүген без якташыбыз - ефрейтор Жаров Юрий Анатольевичны соңгы юлга озатабыз, ул хәрби антына тугры калып, хәрби бурычын үтәү барышында батырларча һәлак булган. Юрий –илебезнең чын каһарманы, Ватанны саклауга беренчеләрдән булып китә һәм алгы сызыкта сугыша. Күп кенә зәйлеләр хәтерли, 2022 елның 9 декабрендә-Ватан Геройлары көнендә без аңа тантаналы рәвештә лаеклы дәүләт бүләген тапшырдык. Россия Федерациясе Президенты Указы белән Донецк һәм Луганск халык Республикаларында махсус хәрби операциядә катнашкан Юрий Жаров хәрби бурычын үтәгәндәге казанышлары өчен "Батырлык өчен” медале белән бүләкләнгән иде. Шуннан соң да ул сугышчан дусларын озакка калдыра алмады, Россия Оборона министрлыгы белән кабат килешү төзеп, яңадан илебез чикләрен сакларга китте, шуның белән чын патриотлык, Ватанга һәм хәрби бурычка тугрылыгын исбатлады. Кызганычка каршы, сугыш югалтуларсыз булмый. Юрий Жаров йөзендә без туган районыбызның һәм илебезнең тагын бер чын улын югалттык. Хөрмәтле Анатолий Антонович, Юрийның туганнары һәм якыннары! Россия Федерациясе Президенты, Татарстан Республикасы Рәисе, шәхсән үз исемемнән һәм барлык зәйлеләр исеменнән олы кайгыгызны уртаклашам! Барыбыз да сезнең белән бергә хәсрәттә. Без Юрий Анатольевич белән горурланабыз һәм аның турындагы истәлекне йөрәкләребездә мәңгегә сакларбыз. Сугышчы тыныч йокласын. Ватаныбызның азатлыгы һәм бәйсезлеге өчен һәлак булганнарга мәңгелек дан!",- диде Разиф Галиевич. Чарада катнашучылар алдында шулай ук Татарстан Республикасы Дәүләт Советы депутаты Илшат Әминов, хәрби комиссариат вәкиле Георгий Борисов чыгыш ясады. Россия Федерациясе Президенты Указы белән хәрби бурычын үтәгәндә күрсәткән батырлыгы һәм фидакарьлеге өчен ефрейтор Жаров вафатыннан соң Батырлык ордены белән бүләкләнә. Хәрби хезмәткәрне соңгы юлга барлык хәрби хөрмәтләр белән озаттылар. Солдатны бер минут тынлык белән искә алдылар. Юрий Анатольевичны туган авылы зиратына җирләделәр. Герой турындагы истәлек зәйлеләрнең йөрәкләрендә мәңге яшәр.