ЯҢАЛЫКЛАР

14 мартта район Башкарма комитеты җитәкчесе И.Ф.Хафизов, әлеге эш юнәлеше өчен җаваплы белгечләр белән берлектә, 2018 елда районада республика программалары кысаларында гамәлгә ашырылучы капиталь төзелеш һәм төзекләндерү объектларында булды анда башкарылучы эшләрнең сыйфаты, техника куркынычсызлыгы һәм хезмәтне саклау нормаларының үтәлеше каралды. Бүгенге көндә барлык эшләрдә төгәл, куелган графикка нигезләнеп башкарыла. Төзелеш объектларындагы эш барышын урынга чыгып карау даими рәвештә үткәреләчәк.

14 нче мартта районда предприятие, оешма, учреждения һәм шәхси эшмәкәрләр өчен киңәйтелгән киңәшмә узды. Анда район Башкарма комитеты җитәкчесе И.Ф.Хафизов катнашты. Киңәшмә яңа форматта, җитәкчеләр һәм кадрлар бүлеге хезмәткәрләре өчен әзерләнгән иде. Үзенең чыгышында Илнар Хафизов, районда хезмәт базары тотырыклылыгын даими тәэмин итүгә юнәлдерелгән төп бурычларны билгеләде. Казан шәһәренең “Бинк” социаль-эшлекле клубы укытучысы И.В. Халяпина хезмәт законындагы төп үзгәрешләр белән таныштырды. Киңәшмәдә “Җаваплы хезмәт бирүче-2017” конкурсына йомгак ясалды. Конкурс нәтиҗәләре буенча 13 җитәкчегә район Башкарма комитеты җитәкчесенең Дипломнары тапшырылды. Очрашуда катнашучылар үзләрен кызыксындырган барлык сорауларга җавап алдылар.

Районыбызның «Аленка» балалар бакчасында эшләүче музыка белгече Храмова Елена Ивановна 14 нче мартта Казан шәһәрендә үткән “2018 нче ел тәрбиячесе” конкурсында мастер- класс күрсәтте.

13-22 мартта Татарстан Республикасы Мәгариф һәм фән министрлыгы грантка ия булу өчен, иҗтимагый оешмалардан конкурста катнашу буенча гаризалар кабул итә. Конкурста, оешуларына кимендә 1 ел булган һәм закон тәртибендә теркәлгән иҗтимагый оешмалар катнаша ала. 2018 елда 200 әр мең сумлык 5 грант бирү каралган. Мәгълүмат алу өчен (843) 294-95-10 телефоны буенча Кәримов Рүзәл Таһировичка (мәгариф һәм фән министрлыгының әйдәп баручы белгече) мөрәҗәгать итәргә мөмкин.

13 мартта “Энергетик” Мәдәният сараенда Зәй шәһәренең тарихи үзәге – “Мәктәп тавы”н заманча төзекләндерү буенча ачык тыңлаулар үтте. Анда шәһәр-район җитәкчелеге, шәһәр һәм район Советы депутатлары, иҗтимагый, яшьләр оешмалары активистлары, эшмәкәрләр, дин әһелләре, территориаль җирле үзидарәләр рәисләре, җир участоклары һәм биналары якында урнашкан милек хуҗалары һәм арендаторлар катнашты.Район башлыгы чыгышында соңгы елларда шәһәр-районда иҗтимагый киңлекләрне заманча итеп үзгәртү юнәлешендә максатчан эш алып барылуын билгеләп үтте. Проект буенча ачык тыңлаулар яңа форматта һәм анда катнашучыларның зур активлыгы белән узды. Проектны исә Ринат Фәрдиев исемендәге парк концепциясен булдырып, аны тормышка ашырган Казанның яшь архитекторлары эшләгән. Тыңлауларда катнашучыларга алар проект буенча нәрсәләр каралуын тәфсилләп аңлаттылар. Зәйлеләр проектны тулаем хупладылар, шул ук вакытта күп кенә тәкъдимнәр дә керттеләр. Төзекләндерү эшләренә май аенда керешелер дип көтелә.

Бүген Казанда Татарстан Президенты Рөстәм Миңнеханов катнашында энергоресурусларны файдалану мәсьәләсенә багышланган зур киңәшмә үтте. Анда Зәй районы башлыгы Разиф Кәримов, район җитәкчеләре дә катнашты. Разиф Кәримов биредә “ Энергосервис контракты механизмы аша Зәй шәһәре урамнарын яктыртуны модернизацияләү буенча проектны тормышка ашыру турында” дип исемләнгән доклад белән чыгыш ясады. Татарстан Президенты фикеренчә, Зәй ГРЭСы да җитди потенциалга ия.

13 мартта Гулькин һәм Төги авылы җирлекләрендә соңгы халык җыеннары узды. Очрашу вакытында авыл халкына 2017 елда районда башкарылган эшләр һәм 2018 елга куелган планнар турында тулы мәгълүмат бирелде. Халык җыеннарында авыл җирлекләре башлыкларының еллык йомгаклау отчеты, авыл хуҗалыгы өлкәсе, башка халыкка хезмәт күрсәтү өлкәсендә эшләүче җитәкчеләр һәм белгечләр, участок полицияләренең чыгышлары тыңланды. Җыенга йомгак ясап, район башлыгы урынбасары В.Г.Акатьев авыл җирлекләре тормышында аеруча актив катнашучыларга Рәхмәт хатлары тапшырды.

13 нче мартта хакимиятнең зур залында Зәй районы башлыгы урынбасары В.Г.Акатьев катнашында дәүләт органнарында һәм иҗтимагый оешмаларда эшләүче хезмәткәрләрнең гомүми профсоюз җыелышы булды. Конференциянең көн тәртибенә 5 сорау куелган иде. Профсоюз оешмаларының 2017 елда башкарган эшчәнлеге һәм 2018 елга куелган бурычлары белән район профсоюз оешмалары җитәкчесе Е.В.Недошивина таныштырды, шулай ук башка профсоюз оешмалары рәисләренең чыгышы тыңланды. Район башлыгы урынбасары В.Г.Акатьев иң актив профсоюз әгъзаларын котлады, аларга Рәхмәт хатлары тапшырды.

13 мартта хакимияттә, Зәй районы башлыгы урынбасары В.Г.Акатьев катнашында үткән киңәшмәдә, 14-18 март көннәрендә "Ялта-Зәй"дә узачак чаңгы ярышларына әзерлек мәсьәләләре каралды. Киңәшмәдә районның спорт, мәгариф, мәдәният һәм яшьләр белән эшләү идарәсе җитәкчеләре һәм белгечләре, район масса -күләм мәгълүмат чаралары хезмәткәрләре катнашты. В.Г.Акатьев ярышка ныклап әзерләнергә һәм аны тиешле дәрәҗәдә үткәрергә кирәк булуы хакында тагын бер кат ассызыклады.

Кичә 7 нче мәктәптә район башлыгы Р.Г.Кәримов “35 нче квартал”, Воздвиженка һәм Кармалка бистәләрендә яшәүчеләр белән очрашты. Район башлыгы җыенга килгән халыкны узган 2017 елда районда башкарылган эшләр һәм киләчәккә куелган планнар белән тулы таныштырды. Шәһәр башкарма комитеты җитәкчесе С.В.Максимов шәһәрне төзекләндерү планы турында сөйләде.Җыенда шулай ук торак-коммуналь хуҗалыгы идарәче компаниясе башлыгы С.В.Ефремов, участок полициясе Н.А. Комаровларның отчеты тыңланды. Ел дәвамында аеруча актив эшчәнлек алып баручы өлкәннәргә район башлыгы һәм башкарма комитет җитәкчесенең Рәхмәт хатлары тапшырылды. Җыенга йомгакны район башлыгы Р.Г.Кәримов ясады.