ЯҢАЛЫКЛАР

18-19 февральдә Биектау район үзәгендәге спорт сараенда яшүсмерләр арасында «Сабантуй» газетасы призына республика турниры узды. Анда “Зәй” балалар-яшүсмерләр спорт мәктәбеннән бер төркем яшүсмер көчләрен сынады. Югары Пәнәчедән Альберт Сәхабиев үз авырлык үлчәвендә чемпион калды. Узган ел Альберт Мамадышта яшүсмерләр арасында «Сабантуй» газетасы призына узган республика турниры һәм Россия беренчелегенә ярышларда чемпион калган иде. Аны ярышларга тренер Айрат Минһаҗев әзерләде.

Узган җомгада Түбән Камада Зәй якташлык җәмгыятенең 15 еллыгы уңаеннан “Көчле рухлы туган ягым” дип исемләнгән кичә узды. Анда Зәйдән башкарма комитет җитәкчесе Илнар Хафизов җитәкчелегендә делегация катнашты.

Бүген район башкарма комитеты җитәкчесе И.Ф. Хафизов рәислегендә гадәттән тыш хәлләр һәм янгын куркынычсызлыгын кисәтү мәсьәләләре буенча киңәйтелгән киңәшмә узды. Киңәшмәдә Торак фондында янгын куркынычсызлыгын һәм гражданнар иминлеген тәэмин итү мәсьәләләре буенча Зәй районы янгын - сак гарнизоны бүлеге башлыгы И.А.Шәяхмәтов чыгыш ясады. Гадәттән тыш хәлләрне алдан кисәтү һәм язгы су басуларны булдырмауга кагылышлы мәсьәләләр буенча Татарстан Республикасы Гражданнар оборонасы эшләре һәм гадәттән тыш хәлләр министрлыгының әйдәп баручы киңәшчесе Р.Г.Смирнов сөйләде. Киңәшмәне район башкарма комитеты башлыгы И.Ф.Хафизов йомгаклады.

16 нчы февральдә Иске Зәй бистәсендә урамнар буенча җаваплы өлкәннәр белән очрашу булды. Очрашуның көн тәртибендә янгын куркынычсызлыгын тәэмин итүгә кагылышлы мәсьәләләр каралды. Ел башыннан Зәй муниципаль районында булган 10 янгын чыгу очрагынның яртысы Иске Зәй бистәсендә теркәлгән. Янгын куркынычсызлыгын тәэмин итү хезмәткәре А.Т.Хәбибуллин, янгын чыгуның күп очраклары көнкүрештә килеп чыгуы хакында тагын беркат ассызыклады. Шәһәр башлыгы урынбасары Е.В.Недошивина быелның 1 нче мартыннан бистәдә территориаль иҗтимагый үзидарә, дәүләт янгын куркынычсызлыгы оешмалары, полиция хезмәткәрләре белән берлектә янгын куркынычсызлыгын тәэмин итүне тикшерү планнаштырылуы хакында сөйләде. Очрашу азагында бистәдә яшәүчеләрне кызыксындырган барлык сорауларга шәһәр башкарма комитеты җитәкчесе С.В.Максимов җавап бирде.

Әлмәттә, һөнәри белем бирү оешмалары студентларының IV спартакиадасы кысаларында, төбәк чаңгы ярышлары үтте. Ярышларда катнашкан Зәй политехник көллияте командасы, уңышлы чыгыш ясап, беренче урынны алды. Алга таба Зәй студентлары 9 төбәктә үткәрелгән узышлар җиңүчеләре белән финал ярышларында көч сынашачак.

Сәвәләй авылы җирлегендә истә калырлык очрашу үтүе турында «Яңа Зәй» газетасы битләрендә хәбәр ителгән иде. Район башлыгы Р.Г.Кәримов терлекчелек өлкәсендә озак еллар эшләп, олы тәҗрибә туплап лаеклы ялга чыккан хезмәт ветераннарын авылның үзгәртеп корылган товар-сөтчелек фермасына очрашуга чакырды. Элеккеге елларда Иске Маврин, Сәвәләй авылларында сыер савучы, бозау караучы һәм терлекче булып эшләгән ветераннарны авыл җирлеге башлыгы, «Зәй шикәре»агрофирмасының Сәвәләй бүлекчәсе җитәкчесе, ферма мөдире бик теләп каршы алдылар. Бүгенге көндә терлекчелек өлкәсендә булган үзгәрешләр һәм яңалыклар белән районның баш терлекчесе Шәфыйк Хәмидуллин таныштырды.

Түбән Камада “Ел тәрбиячесе – 2017” республика бәйгесенең төбәк этабы узды. Анда Зәй, Түбән Кама, Тукай, Алабуга районнары педагоглары көч сынашты. Район данын бәйгедә Л. Вәлиуллина (“Урман әкияте” балалар бакчасы), С. Зәйнуллина ( “Шатлык”), Н. Бакиева (“Теремкәй”) яклады.

14 нче февральдә Зәй районы мәдәният йортларында “Йолдызлык-2017” фестиваленә сайлап алу туры үтте. Якты Күл, Александр Бистәсе, Югары Шепкә, Поручик авыл җирлекләренең 7дән-14 яшькәчә балалары җыр, бию һәм әдәби сүз номинацияләрендә катнашып, үзләренең талантларын тагын беркат күрсәттеләр.

Кичә хакимиятнең зур залында йортлардагы җаваплы өлкәннәр белән очрашу булды. Киңәшмәне район башлыгы Р.Г.Кәримов ачты. Чарада «Бердәм хисап үзәге» директоры Г.Н.Камышова, «Искра» ҖЧҖ директоры И.С.Кравцов, «Таттелеком» акционерлык җәмгыяте башлыгы Г.М.Будрин, Зәй газ идарәсе башлыгы А.А.Йосыфов һәм торак – коммуналь хуҗалыгы үзәге муниципаль учреждениясе вәкиле Х.В.Хүҗиннарның чыгышы тыңланды

15 февраль көнне Әфганстан җиреннән совет гаскәрләре чыгарылганга , быел 28 ел булды. Бу көнне Әфганчылар, кайнар нокталарда хәрби хезмәт үткән зәйлеләр, аларның якыннары, балалары, шәһәр мәктәпләре укучылары традицион төстә Азатлык китерүче солдат һәйкәле янына җыелды. Чараны тантаналы төстә район башлыгы урынбасары В.Г.Акатьев ачты. Һәйкәл каршына чәчәкләр салып, кайнар нокталарда ятып калган Зәй егетләрен бер минут тынлык белән искә алдылар . Район башлыгы урынбасары үзенең чыгышында, Чечня һәм башка кайнар нокталарда хәрби бурычын үтәгәннәр турында искә алып, аларның хәрби бурычларына тугры булулары хакында без буыннан- буынга җиткерергә бурычлыбыз,дип билгеләп үтте.