ЯҢАЛЫКЛАР

Быел районыбызда язучы Сөббух Рәфыйков исемендәге премиягә билгеле рәссамнарыбыз Виктор Хрулев һәм Сергей Цыганов лаек булды. Лауреатларны язучы исемен йөрткән үзәк китапханәдә тантаналы төстә район башлыгы урынбасары В.Г. Акатьев, район җитәкчелеге, иҗатка гашыйк зәйлеләр тәбрикләде. Виктор Хрулев -Татарстан һәм Россия Рәссамнар берлеге әгъзасы. Аның 40 еллык иҗатын санына чыгып бетерә алмаслык пейзаж, натюрморт, портретлар, иконалар бизи. Сергей Цыганов исә Татарстан Рәссамнар берлеге әгъзасы һәм төрле дәрәҗә иҗат күргәзмәләрендә аның эшләре югары бәя алып килә. Тәбрикләүләр “Азаль” вокаль-хореография ансамбле һәм җирле иҗат шәхесләре чыгышы белән аралашып барды.

Язучы Сөббух Рәфыйковның соңгы 14 ел гомере, иҗаты Зәй җире белән тыгыз бәйләнештә була. Биредә үзен кабул иткән, яраткан зәйлеләргә язучы үз әсәрләрендә тирән рәхмәтле булуын белдерә. Бүген Сөббух Рәфыйковка исән булса 104 яшь тулган булыр иде. Күркәм традицияне дәвам итеп, Сөббух Рәфыйков исемендәге үзәк китапханә коллективы инициативасы белән, бүген аның каберенә барып искә алу чарасы үткәрелде. Анда хакимиятнең милли мәсьәләләр, иҗтимагый оешмалар белән эшләүче бүлеге баш белгече Алсу Хисмәтуллина, ветераннар Советы рәисе Марсель Хуҗин, үзәк китапханәләр челтәре директоры Чулпан Шәйхиева, Кафил хәзрәт Хисамиев, "Зәй офыклары" газетасы журналистлары килде. Үзәк китапханә хезмәткәрләре тарафыннан даими тәртиптә тотылучы каберлеккә кызыл канәфер чәчәкләре салынды.

Бүген Зәйдә Чистай шәһәре ветераннар советы делегациясе булып китте. Аларны район ветераннар советы рәисе Марсель Хуҗин һәм совет идарәсе әгъзаләре Мирный бистәсе янында ук каршы алды. Җылы очрашудан соң кунаклар Иске Зәй бистәсенә юл тотты. Биредә алар башта туган як тарихын өйрәнү музеенда булып, даими эшләүче экспозицияләрне карадылар, Зәй тарихы белән таныштылар. Музейның күргәзмәләр залындагы җирле рәссам Сергей Цыганов картиналарыннан торган күргәзмә кунакларда зур кызыксыну уятты. Чистайлылар өчен экскурсия мәктәп тавында дәвам итте. Мондагы алар Крестовоздвижение чиркәвенең мәчет белән янәшә торуы Зәйдә динара мөнәбәтләрнең бик яхшы булуына игътибар иттеләр. Кунаклар шәһәр буенча да эксурсия кылдылар, Зәйнең йөзен билгеләүче Ринат Фәрлиев исемендәге паркны карадылар. Әлбәттә, делегация Зәй ветераннар советы эш тәҗрибәсе белән дә танышты. Тәҗрибә уртаклашуның дәвамы булып, тиздән Зәй ветераннары делегациясе Чистайга барачак.

Яңа кагыйдәләр нигезендә 7 яшькә кадәр булган балаларны ялгызларын гына автомобиль салонында калдырырга ярамый. Калдырылган машинада 7 яшькә кадәрге ялгыз бала булганда, ЮХИДИ хезмәткәрләре машина йөртүчене административ җаваплылыкка тартачак. Яңа кагыйдәләр нигезендә 7 яшьтән өлкәнрәк балаларны куркынычсызлык каешы белән йөртергә рөхсәт ителә. Кече яшьтәге балаларны махсус утыргычта йөртү мәҗбүри. Шул ук вакытта 12 яшьтән кече балаларны мотоциклның арткы утыргычында йөртү рөхсәт ителми.

Питрау бәйрәмен керәшен халкы гына түгел, бөтен республика халкы көтеп аладыр. Әлбәттә шулай, Зәй районында да бу бәйрәмне уздыруның үзенә генә хас матур төсмерләре, нечкәлекләре барлыкка килде. Бу бәйрәмне олылап, бөтенхалык бәйрәме итеп, шул ук вакытта керәшеннәрнең күркәм йолаларын, гореф – гадәтләрен саклап үткәрү районыбызда матур бер традициягә әйләнде. Керәшен халкы үз тарихын, мирасын, гореф–гадәтен, мәдәниятен саклап яши. Питрау – халыкның җорлыгын, кунакчыллыгын, киң күңеллелеген, көчен, бердәмлеген күрсәтә торган бәйрәм. Һәм шул ук вакытта Питрау ул – җыр, моң, табигать, чәчәк бәйрәме. Питрау бәйрәме белән һәммәгезне дә ихлас күңелдән котлыйбыз! Тынычлык, татулык һәм иминлек идеалларын да гәүдәләндерүче әлеге ямьле бәйрәм рухи тормышыбызга аерым бер мәгънә бирер, безне яңа, изге эшләргә һәм гамәлләргә рухландырыр, дип ышанабыз. Ил-көннәргә тынычлык, гаиләләрегезгә иминлек, хезмәт уңышлары, исәнлек-саулык, бәхет телибез. Алга таба да шулай бергә булырга язсын.

Үзәк китапханәдә Гаилә, мәхәббәт һәм тугрылык көненә багышлап ” Барлык кыйммәтләр чыганагы – Гаилә” дип исемләнгән әдәби – музыкаль кичә уздырылды. Бәйрәмгә иң күп китап укучы гаиләләр – әти –әниләр һәм аларның балалары чакырылды. Алар: Поповлар, Садковлар, Кошкиннар, Исштановлар һәм Ишмухаметовлар гаиләләре. Әйе, кешенең иң зур бәхете - аның гаиләсе. Гаилә - тормышыбызның нигезе, дәүләтебезнең киләчәге ул. Без гаиләдә үзебезне иң кирәкле, иң яраткан кеше итеп тоябыз. Ә әти-әни, әби-бабай гаиләдә иң хөрмәтле кешеләр. Матур гаиләдә бер-береңне хөрмәтләп, бер-береңә ярдәм итеп яшәүгә ни җитә! Кичәне алып баручылар, кунакларны бу бәйрәмнең килеп чыгу тарихы, изгеләр Петр һәм Феврония турындагы матур риваять белән таныштырдылар. Кичә барышында гаиләләр узара төрле конкурсларда көч сынаштылар: гаилә турында мәкалъләр һәм әйтемнәрне искә төшерделәр, кроссворд чиштеләр, гаилә әгъзаларынең исемнәре кергән әдәби әсәрләргә тукталдылар. Һәр гаилә кәгазъдә, матур сүзләрдән үзенең “Хыялдагы йортын” төзеде. Ә балаларга иң ошаганы шарлар белән уен һәм “Мәрхәмәтле сүзләр” уеннары булды. Кичә ахырына конкурсларның бәяләмәсе булган ромашка таҗларыннан һәрбер гаилә үз ромашкасын җыйды. Матур җырлар, эчтәлекле шигыръләр кичәгә ямь өстенә ямь өстәде. Кичәдә катнашучы барлык гаиләләргә дә истәлекле бүләкләр тапшырылды. Бәйрәмебез “Бердәм Россия” партиясенең Зәй бүлекчәсе ярдәме белән уздырылды.

Зәйдә яшәүче хезмәт ветераны Шахмаева Елена Алексеевна бүген зур юбилеен – 95 яшен билгеләп үтте. Юбилярны шәһәр башлыгы урынбасары Недошивина Е.В. котлады, район башлыгы исеменнән бүләк тапшырды. Хезмәт ветеранын котларга “Зәй шикәре” АҖ генераль директоры Антон Трошин да килде. Ул ветеранга тырыш хезмәте өчен рәхмәт белдерде.

Зәй районы башлыгы Разиф Кәримов зәйлеләр һәм шәхсән үз исеменнән, 2017 елның 2 июлендә килеп чыккан фаҗига белән бәйле, һәлак булучыларның туганнары һәм якыннарының һәм шулай ук бу һәлакәттә гомере вакытсыз өзелгән Зәй кызы Мария Раушан кызы Галимованың гаиләсенә килгән авыр кайгыны ихлас күңелдән уртаклашуын белдерә. Зыян күрүчеләрнең тизрәк терелүен теләп кала.

Үткән май аенда Зәй шәһәренең ЗАГС бүлегендә 42 сабый теркәлде: 19 малай һәм 23 кыз. Иң кечкенә бала 2010, ә иң зуры – 4100 грамм. Иң яшь анага – 20, иң өлкән анага 45 яшь. Май аенда иң популяр исемнәр Матвей, Адель, Арсений, Виктория, Мария. Сирәк очрый торган исемнәр Илария, Азель. Шул ук вакыт эчендә ЗАГС бүлегендә 5 пар никахларын рәсми рәвештә теркәгәннәр.

Бүген, 26 май көнне Иске Зәй бистәсендә яңа мәчет ачылды. Мәчет ачу тантанасында  район башлыгы Р.Г.Кәримов, Татарстан Республикасы Президенты Аппаратының дин эшләре буенча вәкиле Р.Н.Хисмәтуллин, Татарстан Республикасы мөселманнарының Диния нәзарәте рәисе- мөфти Камил хәзрәт Сәмигуллин, Зәй муниципаль районы Советы депутаты Ш.Б.Минһаҗев, башка күп санлы дәрәҗәле кунаклар, мәчетне төзүчеләр, күрше-тирә район мөхтәсибләре,ветераннар һәм Зәй халкы катнашты. Бистәдә тулы бер комплекс булды: ул мәчет, уку-укыту үзәгеннән тора. Соңгысында якташ язучы, галим Ялчыгол музее да булдырылды. Бу очраклы түгел, әлеге укыту үзәге Ялчыгол кебек дин галимнәре үстерүгә башлангыч, нигез булып торыр.