Зәйдә комбайннар парады үтте

Зәй районы агрофирмалары бүлекчәләрендә комбайннар парадлары үтте. Зәй игенчеләре шушы бер атна эчендә урып-җыюга җиң сызганып керешергә исәп тота. Комбайннар парадлары исә, зур эшкә тотыныр алдыннан техниканы тагын бер кат күзәтү, сынау максатын күздә тотып оештырылды. Районыбыз аграрийлары алдына район җитәкчелеге, «Агрокөчтөркем» ЯАҖ , «»Финагротрейд» оешмасы җитәкчеләреннән торган мәртәбәле комиссия бөртеклеләрне югалтуларсыз җыеп алу, һәр көннең кадерен белеп эшләү бурычын куйды. Район башлыгы Разиф Кәримов исә механизаторлар алдына бөртеклеләрне урып-җыю эшен август аенда төгәлләү йөкләмәсен билгеләде. Комбайннар парады иң беренче районыбызның «Зәй шикәре» агрофирмасына караган «Сәвәләй» бүлекчәсендә үтте. Биредә 4 комбайнның әзерлеге уңай бәяләнде. «Зәй шикәре» агрофирмасы җитәкчесе Фоат Камалиев билгеләп үткәнчә, быел агрофирмага караган басуларда бөртеклеләр 9200 гектар мәйданны тәшкил итә, бүгенге көндә хуҗалыкта эшкә әзер 13 комбайн исәпләнә, алар урып-җыю чорына тагын 5 яңа комбайн кайтуын көтә.