Зәйдә районның элеккеге башлыгы Ринат Фәрдиевне искә алдылар
Бүген зәйлеләр Ринат Фәрдиев истәлегенә чәчәкләр салдылар, аның турында җылы хатирәләре белән уртаклаштылар. Истәлекле композиция янына паркка 30 ел гомерен Зәй җиренә багышлаган бу гадәти булмаган кешенең истәлеген саклаучылар җыелды.
"Аның хезмәт юлы һәр яктан Зәй районы үсешенә, анда яшәүчеләрнең уңайлы, сыйфатлы хезмәт һәм яшәү шартлары тудыруга ихлас хезмәт үрнәге булып торды. Җирне, табигатьне, кешеләрне, тормышны чын күңелдән яраткан, мөмкин кадәр күбрәк игелекле эшләр башкарырга омтылган Ринат Фәрдиев ярдәме белән шәһәргә артезиан суы килде, аның сыйфаты буенча республикада тиңнәр юк. Ул спортны, милли көрәшне үстерүгә күп көч куйды, аның вакытында шәһәрдә беренче бассейн, боз сарае төзелде. Үзе спортны яратты, чаңгыда йөрде, атнага бер тапкыр бассейнда йөзде. Ринат Шәех улы зәйлеләргә нәкъ менә шундый ачык күңелле, позитив кеше булып истә калды», - диде үз чыгышында район башлыгы урынбасары Петр Уразайкин.
Фәрдиевләрнең олы кызы Илсөя Ринат кызы да үз хатирәләре белән уртаклашты. Бу минутларда җыелганнарның һәркайсының исенә төшерер хатирәсе бар иде, һәм бу истәлекләрнең якты булуы Ринат Шәех улы Фәрдиевнең шундый изге күңелле кеше булуын тагын бер кат күрсәтте. Бүген аңа 69 яшь тулган булыр иде.