Зәй мөселманнары Корбан бәйрәмен билгеләп үтә
Бүген Зәй районының 28 мөселман мәхәлләсендә Корбан бәйрәме уңаеннан бәйрәм намазлары узды. Шәһәр һәм район мөселманнары иртә таңнан мәчетләргә намазга җыелдылар.
Таҗетдин Ялчыгол исемендәге үзәк мәчеттә үткән бәйрәм намазында район башлыгы Разиф Кәримов та катнашты. Разиф Гали улы мәхәллә кешеләрен якты Корбан бәйрәме белән котлады, барысына да тынычлык, муллык һәм иминлек теләде.
Район имам-мөхтәсибе Фатих хәзрәт Нуруллин корбан чалу бәйрәменең тарихы һәм үзенчәлекләре турында сөйләде. Изге Коръәннән сүрәләр, аятьләр, вәгазь укыды, шуннан соң барысы да бәйрәм намазында катнашты. Дин тотучылар чын күңелдән җир йөзендәге тынычлык, барлык милләт һәм дин кешеләре бер зур гаилә булып тату яшәсен дип дога кылдылар. Бердәм намаздан соң барысы да чарада катнашучылар өчен әзерләнгән тәмле пылау белән сыйландылар.
Район буенча чарада барлыгы 1886 кеше катнашты.