Шәһәр һәм район мәктәпләрендә соңгы кыңгырау чыңлады
Тагын бер уку елы тәмамланды. Бу көнне, 24 майда, Зәй муниципаль районы мәктәпләрендә 105 - 11 нче сыйныф укучысы һәм 507 - 9 нчы сыйныф укучысы өчен соңгы кыңгырау яңгырады, һәр чыгарылыш сыйныф укучысы өчен яңа тормыш юлына старт бирелде. Уку дәверендә балалар мөһим белемнәр тупларга, иҗади мөмкинлекләрен ачарга, үз фикерләрен белдерергә, илебезгә карата тагында зурырак хөрмәт белән карарга өйрәнделәр - болар барысы да киләчәктә тормыш авырлыкларын җиңеп чыгу өчен ышанычлы нигез булачак. Район башлыгы Разиф Гали улы Кәримов шәһәребезнең аерым фәннәрне тирәнтен өйрәнүче 7 нче мәктәбендә үткән тантаналы линейка вакытында барлык чыгарылыш укучыларын соңгы кыңгырау бәйрәме белән котлады, аларның имтиханнарны уңышлы үтүләренә ышаныч белдерде, киләчәктә алга барырга һәм яңа үрләргә омтылырга өндәде. Яшьләргә белем бирүгә керткән өлеше, һөнәри сыйфатлары һәм яшь буынны тәрбияләү эшенә тугрылыклары өчен, мәктәпнең педагогик коллективына, хезмәтләре, җаваплылыклары һәм балаларга карата кайгыртучан мөнәсәбәтләре белән җәмгыятьнең лаеклы әгъзаларын формалаштыруда төп роль уйнаган ата-аналарга аерым рәхмәт сүзләре җиткерелде. Шәһәр һәм район мәктәпләрендәге тантаналы чараларда шулай ук район башкарма комитеты җитәкчесе Эмиль Эдуард улы Галиев, мәгариф бүлеге башлыгы Эрнст Рәис улы Сәфәргалиев, район хакимияте вәкилләре һәм авыл җирлекләре башлыклары катнашты. Җыелганнарның барысы да укучыларны олы тормыш юлын башлаулары белән котладылар, аларны алга таба да шәхси сәләтләрен үстерергә, уңышларга ирешергә өндәделәр һәм үз республика һәм ватаннарына файдалы шәхесләр булып хезмәт итүләрен теләделәр.