«Планетаны чүп-чардан саклыйк»
Балаларда экологик культура формалаштыруны мәктәпкәчә яшьтән башларга кирәк. Баланы табигать дөньясына кертү, аны аңларга өйрәтү, аңа карата сакчыл мөнәсәбәт тәрбияләү - балалар бакчасының һәм ата-аналарның иң мөһим бурычы. Бу юнәлештә уңышларга ирешү өчен балалар бакчасы педагоглары төрле эш формаларын кулланалар. «Күкчәчәк» балалар бакчасының чәчәк атып утырган матур алма бакчасында «Планетаны чүп-чардан саклыйк» дип аталган физкультура-экология чарасы оештырылды. Әлеге чара спорт һәм экологик культураны берләштерүнең уңышлы үрнәге булды. Мәктәпкәчә яшьтәге балалар әйләнә-тирә дөнья турында яңа белемнәр алып кына калмадылар, тизлек, җитезлек күрсәтеп, бергәләп эш итә белергә өйрәнделәр. Спорт эстафеталары өчен барлык җиһазлар да педагоглар тарафыннан ташландык материалдан эшләнгән иде, бу экологик тәрбия ягыннан аеруча мөһим. Мондый чаралар табигатькә һәм сәламәт яшәү рәвешенә сакчыл караш формалаштыруда мөһим роль уйный.