Район ифтары мөселман җәмәгатьчелеген берләштерде

Унберенче ел ул район башлыгы Разиф Кәримов инициативасы буенча мөхтәсибәт белән берлектә уздырыла. Ифтар мәҗлесе янәдән мөселман активын, Зәй имамнарын, мәчетләргә йөрүчеләрне, җитәкчеләрне бер өстәл артына җыйды. Рамазан аенда ураза тотучы диндәшләренең шатлыгын уртаклашырга дини мәсьәләләр буенча куратор – Татарстан Республикасы Рәисенең Эчке сәясәт мәсьәләләре департаменты Дини берләшмәләр белән үзара хезмәттәшлек идарәсенең дәүләт - конфессиональ мөнәсәбәтләр бүлеге баш киңәшчесе Гадел Хәсәншин килде. Аның визиты чараның әһәмиятен һәм республика җитәкчелеге тарафыннан дини инициативаларга ярдәм итүне ассызыклады. Очрашу район имам-мөхтәсибе Фатих хәзрәт Нуруллинның Коръән аятьләрен укуыннан башланды. Ул шулай ук дин тотучы тормышында уразаның рухи мәгънәсе турында сөйләде, зәйлеләрне игелекле гамәлләр һәм гыйбадәт кылырга өндәде. Сәламләү сүзе белән район башлыгы Разиф Кәримов чыгыш ясады, ул изге Рамазан аенда мөселман җәмәгатьчелегенең бердәмлеге һәм үзара ярдәмләшү традицияләренең мөһимлеген ассызыклады. Разиф Галиевич кыскача гына дин тотучыларны район эшчәнлегенең төп күрсәткечләре белән таныштырды, зәйлеләргә махсус хәрби операциядә катнашучыларга һәм госпитальләргә гуманитар ярдәм җыюны оештырганнары өчен рәхмәт белдерде, барысына да ныклы сәламәтлек һәм тыныч күк йөзе теләде. "Изге Рамазан аенда барыбыз да тизрәк җиңү сорап дога кылабыз, - диде район башлыгы. - Аллаһы Тәгалә догаларыбызны һәм уразаларыбызны кабул итсен"». Дини мәсьәләләр буенча куратор Гадел Хәсәншин, үз чиратында, мондый рухи чараларның мөһимлеген билгеләп үтте, районга алга таба да үсеш, конфессияара татулыкны һәм ата-бабаларыбызның яхшы традицияләрен саклап калуны теләде. Кояш баегач, ислам диненең борынгы йолалары буенча авыз ачу - ифтар йоласын үтәделәр. Аннары барысы бергә ахшам намазын укыдылар. Намаздан соң бәйрәм табынында кичке аш башланды, анда кунаклар татар ашларыннан һәм бер-берсе белән аралашудан ләззәт ала алдылар.