Зәй укучылары өчен “Кырым – Ватанга юл” тематик очрашуы үткәрелде

Россиянең традицион рухи-әхлакый һәм мәдәни-тарихи кыйммәтләре нигезендә гармонияле, патриотик һәм социаль җаваплы шәхес тәрбияләүгә юнәлдерелгән “Яшьләр һәм балалар” илкүләм проектының “Без бергә” федераль проекты кысаларында, Зәйнең 4 нче мәктәбе укучылары өчен үзәк китапханәдә Кырымның Россиягә кушылуы көненә багышланган “Кырым – Ватанга юл” тематик очрашуы уздырылды. Быел ул тарихи датага 11 ел тулды. Укучылар Кырым ярымутравының барлыкка килү тарихы, аның бай табигате һәм иң танылган истәлекле урыннары, Кара диңгез флоты, 2014 елның 18 мартындагы тарихи вакыйганың әһәмияте турында күп кызыклы мәгълүмат белделәр. Бөек Ватан сугышында Кырымның роленә һәм Севастопольне каһарманнарча саклауга аерым игътибар бирелде. Соңыннан укучылар “Син Кырымны беләсеңме?" дигән викторина сорауларына актив җавап бирделәр. Балалар төрле елларда ярымутрауда яшәгән һәм иҗат иткән рус язучыларын искә төшерделәр. Алар арасында Антон Чехов, Александр Куприн, Константин Паустовский, Максим Горький, Иван Бунин һәм башкалар бар. Укучылар бөек рус шагыйре Александр Пушкинның “Бакчасарай фонтаны” поэмасын да искә алдылар. Яна һәм Саша Кырымга сәфәрләреннән алган тәэсирләре турында сөйләделәр, аларга табигать, борынгы һәйкәлләр, ярымутрауның истәлекле урыннары, кунакчыл кырымлылар бик ошаган. Ә Богдан Ватан турында шигырь сөйләде.