Зәйдә комбайннар парады узды

Бүген район агрофирмаларында комбайннар парады узды. Район башлыгы Р.Г. Кәримов рәислегендә махсус комиссия авыл хуҗалыгы техникасының 2024 елгы урып-җыюга әзерлеген тикшерде. Комиссия эшендә “Агросила Логистика” АҖ һәм агрофирмалар, Россельхозцентр, Гостехнадзор белгечләре катнашты. Комиссиягә ашлык җыю комбайннары, шулай ук салам әзерләү һәм ташу техникасы, җир эшкәртү, ашлык ташу өчен транспорт тәкъдим ителде. Бөртеклеләрне җыюда “Агрокөч” АҖнең 45 комбайны катнашачак. Район башлыгы механизаторлар һәм белгечләр белән әңгәмә барышында бөртекле һәм кузаклы культураларны иң кыска агротехник срокларда һәм югалтуларсыз җыю бурычын куйды. Ашлык җыю техникасының әзерлеген билгеләгәндә герметиклык хәлиткеч әһәмияткә ия, моның өчен һәр комбайнны автополог аша уздырдылар. “Эшләрне башкарганда янгын куркынычсызлыгына һәм хезмәтне саклау мәсьәләләренә аерым игътибар бирергә кирәк”, - дип ассызыклады Разиф Галиевич, моның өчен һәр отряд гадәттән тыш хәлләрдә файдалану өчен су ташучылар һәм агрегатлы трактор белән комплектланган. Комиссия әгъзалары янгын сүндерү чаралары, аптечкалар һәм махсус киемнәр булуны тикшерделәр. Урып-җыю чорында барлык хуҗалыкларда “Агрокөч Сервис” АҖнең кирәкле җайланмалар һәм запас частьләр белән тәэмин ителгән күчмә ремонт бригадалары эшләячәк, моның өчен өстәмә 5 махсус автомашина сатып алынган. Зәй игенчеләренә быел 39,5 мең га мәйданда уңыш җыярга кирәк булачак. Структурасында: уҗым культуралары - 17,3 мең га, язгы культуралар - 22,2 мең га, шул исәптән язгы бодай - 6,9 мең га, арпа - 11,4 мең га, бөртеккә үстерелгән кукуруз - 1,5 мең га, борчак – 2,2 мең га. Район башлыгы барлык механизаторларга һәм белгечләргә авариясез эш теләде. Шушы көннәрдә игенчеләр урып-җыюга керешәчәкләр. Хәерле сәгатьтә!