Зәйлеләр Ринат Шәех улы Фәрдиевне онытмыйлар

15 июнь көнне Ринат Шәех улы Фәрдиевның туган көнендә шәһәр паркында истәлекле билге янына туганнары һәм якыннары, район җитәкчеләре, ветераннар һәм бүгенге көнгә кадәр әлеге күпкырлы шәхес турында якты истәлекне саклаучыларның барысы да җыелды. Җыелган кунаклар аның турында җылы хатирәләр белән уртаклаштылар һәм чәчәкләр салдылар. Ринат Шәех улының бөтен хезмәт биографиясе Зәй районы белән тыгыз бәйләнгән. 1999 елның апреленнән тугыз ел Зәй муниципаль районы хакимияте башлыгы вазыйфасын башкара. Аның җитәкчелегендә социаль-мәдәни, торак-коммуналь мәсьәләләр уңышлы хәл ителде, мәгариф һәм спорт өлкәләрен үстерүдә һәм техник җиһазландыруда зур адымнар ясалды. Ул эшләгән чорда Карамалы елгасы паркы шәһәрнең энҗе бөртегенә әйләнде, соңыннан ул «Р.Ш. Фәрдиев исемендәге парк» исемен алды. Р.Ш.Фәрдиев – Татарстан Республикасы һәм Россия Федерациясенең атказанган авыл хуҗалыгы хезмәткәре», «Фидакарь хезмәт өчен», «Казанның 1000 еллыгы истәлегенә» медальләре белән бүләкләнгән, Татарстан Республикасы муниципаль районнары һәм шәһәр округлары башлыклары Советы Президиумы әгъзасы булган. 2000-2004 елларда Татарстан Республикасы Дәүләт Советы депутаты итеп сайланган.