Зәйдә Мәдәният елы кысаларында уку йортлары ярминкәсе узды

Әйбәт белем алу һәм оста белгеч булып, туган җиргә файда китерү. Зәй районы Башкарма комитеты җитәкчесе урынбасары Александр Чапков вакансияләр һәм уку йортлары ярминкәсендә катнашучыларга шундый теләк теләде. Чара шәһәрнең 7 нче мәктәбендә узды һәм анда район һәм шәһәрнең 250дән артык 9-11 нче сыйныф укучылары, Казан, Әлмәт, Түбән Кама, Зәйдән югары һәм урта һөнәри белем бирү йортлары, Зәй районы үзәк хастаханәсе, Авыл хуҗалыгы һәм азык-төлек идарәсе, «Аккурайд Уилз Руссиа» заводы вәкилләре катнашты. Александр Чапков барлык катнашучыларны район җитәкчелеге исеменнән сәламләде һәм уку йортларын, эш бирүчеләрне тәкъдимне хуплап алулары өчен рәхмәт белдерде. Аның билгеләвенчә, ярминкә уздыру өчен уңайлы формат сайланган. Район Башкарма комитеты җитәкчесе урынбасары 2019 ел Зәй районында Мәдәният елы булып игълан ителүе хакында искәртте. Аның сүзләренчә, культура һәр өлкәдә булырга тиеш. Александр Чапков районның социаль-икътисадый үсеше, гамәлгә ашырылучы проектлар турында сөйләде. Егет һәм кызларның, укуны тәмәмлагач, һичшиксез, кире районга әйләнеп кайтуларына ышаныч белдерде. Зәй шәһәре халык мәшгульлеге үзәге директоры урынбасары Ләйсән Хафизова билгеләвенчә, уку йортлары ярминкәсе яшьләр арасында эшсезлекне кисәтү максатыннан уздырыла. “Яшьләргә хезмәт базарында һәм, беренче чиратта, Зәй районына кирәкле һөнәр сайларга ярдәм итүне төп бурыч итеп куябыз”, - диде ул. Мәгариф идарәсе җитәкчесе вазыйфаларын башкаручы Миләүнә Вәлиәхмәтова дөрес һөнәр сайлауның тормышта бик әһәмиятле булуы хакында ассызыклады. Ярминкәне ачу тантанасында Казан дәүләт мәдәният институты студентлары чыгыш ясады. Ярминкә тәкъдим итү һәм мастер-класслар форматында узды. Һәр уку йорты өчен аерым бүлмә бирелгән иде. Укучылар уку йорты вәкилләре белән аралаша, сорауларын юллый ала алды. Мәшгульлек хезмәте белгечләре тарафыннан һөнәри юнәлеш буенча аерым эш зонасы оештырылган иде. Теләгән һәркем профтест уза алды. Моннан тыш, укучылар эш бирүчеләр белән аралашты, белгечлекләр турында кызыксынды һәм хезмәт шартлары белән танышты.