Зәй көрәшчеләре Биектауда герой- шагыйрь Муса Җәлил турнирында катнаша

9-10 февральдә Биектауда татарча көрәш буенча герой-шагыйрь Муса Җәлил истәлегенә “Ватаным Татарстан” газетасы тарафыннан оештырылган турнирның чираттагысы узачак. Анда район башлыгы Разиф Кәримов җитәкчелегендәге Зәй делегациясе дә катнаша. Турнирда көрәшчеләребездән Дмитрий Левашов, Рөстәм Сәлахов, Булат Гадершин, Линар Садыйков, Рамил Хисмәтуллин, Руслан Хәмидуллин, Илдар Хәмитов, Радик Сәлахов, Сергей Павлик, Рамил Фаршатов, Нияз Җамалиев һәм башкаларның көч сынашуы көтелә. Команданың баш тренеры- Илсур Зиятдинов. Аңа кадәр әлеге турнир ике ел рәттән зур оешканлык белән истә калырдай итеп Зәйдә оештырылды. Икесендә дә безнең команда җиңү яулады. Турнир кагыйдәсе буенча, бер команда өч ел рәттән җиңү яуласа, күчмә кубок аларда кала. Димәк, Биектауда да беренчелекне зәйлеләр яуласа, әлеге мәртәбәле кубок районыбызда калачак. Бил алышулар “Биектау” спорт комплексында узачак. Быел турнир кагыйдәләренә дә бераз үзгәрешләр кертелер дип фаразлана, мәсәлән, көрәшчеләрнең сөлге тоттырмаулары кискен җәзаланачак.