ЯҢАЛЫКЛАР

Авыл халкына ярдәм, терлек баш санын саклау максатында агымдагы елда республика бюджетыннан шактый булышлык ителәчәк. Шәхси ярдәмче хуҗалык алып баручыларга быел буаз тана сатып алуга һәм сөтчелек юнәлешендәге миниферма төзү буенча тотылган чыгымнарның бер өлеше субсидия рәвешендә кире кайтарыла.

Республика юл хәрәкәте иминлеге дәүләт инспекциясе башлыгы Рифкать Миңнеханов бүген Зәйгә эш сәфәре барышында “ Уймак кыз” балалар бакчасында да булды. Биредә алар район башкарма комитеты җитәкчесе Разиф Кәримов, район җитәкчеләре белән берлектә бакчада тәрбияләнүче кече төркем балалар көче белән әзерләнгән “Кызыл калфак юл билгеләре шәһәрендә” исемле тамаша карадылар.

21 июльдә көндезге сәгать 2 дә , Зәй шәһәре, Крупская урамы 6 йортның 3 этажындагы 59 кабинетында(киңәшмәләр залында) әйләнә тирә мохит һәм табигать ресурслары Министрлыгының Кама аръягы территориаль идарәсе башлыгы Алексей Геннадиевич Лобанов гражданнарны кабул итә.

15 июльдән Зәйдә изге гамәлләр фестивале старт ала. Ул “5 изге көн” дип атала. Әлеге фестивальдә һәрбер теләүче катнаша ала. Фестиваль барышында волонтерлар 8 яшьлек Викторияне һәм 28 яшьлек Светлананы дәвалау өчен акча җыю да каралган.

Бүген язучы, шагыйрь Сөббух Рәфыйковның туган көне. Ел да Зәй татар җәмәгатьчелеге тарафыннан аның кабере зират кылына. Әлеге традициягә тугры калып, бүген җәмәгать оешмалары, массакүләм мәгълүмат чаралары белән эшләү һәм милләтара мөнәсәбәтләр бүлеге башлыгы Фәрит Мусин, имам-мөхтәсиб Сәгыйть хәзрәт Камалов, үзәк китапханә директоры урынбасары Рита Әхмәтова, “Зәй офыклары” газетасы журналистлары, язучының оныклары Эмилия белән Айнур Рәфыйковның каберенә чәчәкләр куйдылар.

Зәйдә уракка төшәр алдыннан урып-җыюда катнашачак техниканың торышы комиссия тарафыннан тикшерелүе турында хәбәр иткән идек. “АгроКөч -Төркем” ЯАҖ, район авыл хуҗалыгы идарәсе, “Россельхозцентр”ның Зәй бүлеге белгечләреннән торган комиссия, агрофирмалар бүлекчәләре, “Нива” җаваплылыгы чикләнгән ширкәтендә булып, һәр берәмлек техниканың торышын, ындыр табакларының мөһим компаниягә әзерлеген, урып-җыюда хезмәтне оештыру, куркынычсызлык таләпләре үтәлешен җентекләп тикшерде һәм баллар белән алар әзерлегенә бәя бирде.

Зәйнең “Йолдызлык” балалар ял лагеренда бүген икенче смена төгәлләнә. Анда 110 бала төрле мавыктыргыч чараларда катнашып, физик яктан чыныгып ял итте. Өченче смена эше исә 21 июльдә башлана.

Зәйнең яшьләр эшләре идарәсе Ринат Фәрдиев исемендәге паркта 19 июльдә кичке сәгать 6 да «Йөрәктән йөрәккә” дип исемләнгән хәйрия концерты үткәрә. Анда җыр-бию коллективлары чыгышы, балалар өчен уеннар оештырыла.

14 июль көнне “Россиядә әдәбият елы” уңаеннан балаларны әкият геройлары белән таныштырдылар. Үзәк китапханәнең 7 филиалы хезмәткәрләре көче белән әзерләнгән әлеге чарага А,С Пушкин һәм Л.Н. Толстой әкиятләре буенча викторина сораулары бирелде.

Зәй басуларында уңыш өлгерде, уракка төшәргә яңгырлар гына комачаулый. Агымдагы елда район игенчеләре алдында 40 мең гектардан артык бөртеклеләрне җыеп алу бурычы тора. Быелгы уракта район буенча барлыгы 71 комбайн эшләячәк: бер комбайнга эш йөкләмәсе - 564 гектар.