Зәй районында тагын бер яңартылган мәдәният йорты ишекләрен ачты

Республикабыз Президенты авылларыбызны матурлауга, бөтәйтүгә, анда яшәүчеләргә уңай шартларны мөмкин кадәр күбрәк тудыруга юнәлтелгән социаль программаларга өстенлек бирә. Татарстанда мәдәният учакларын төзекләндерү программасы да әнә шул максатны тормышка ашыруны күздә тотучы күләмле эшләрнең берсе. Аның кысаларында инде Зәй районында Югары Шепкә мәдәният йорты төзекләндерелеп халыкка хезмәт күрсәтә. Кичә исә әлеге программа буенча районыбызның Кадер авылында зур төзекләндерү эшләре башкарылган мәдәният йорты ишекләрен ачты. - Үткәнен барлап, өлкән буынны хөрмәтләп, киләчәк көн турында кайгыртып яшәүче авыл – ул тулы кан белән яши дигән сүз. Без менә Бөек Җиңү бәйрәме алдыннан Кадердә мәдәният йорты ачу тантанасына җыелдык. Бу үзенә күрә үткән белән киләчәкнең бәйләнешен чагылдыра. Ил өчен батыр уллар-кызлар биргән авыл, бүген яшь, яңа буын дәвамчысы булып тора. Ә яшьләр булган җирдә иҗат, матурлык һәрчак чәчәк атарга тиеш. Шуңа да без мәдәният йортын капиталь төзекләндерүгә алындык, - диде үз чыгышында район башлыгы Разиф Кәримов. Кадер авылындагы әлеге мәдәният йорты инде 30 елдан артык файдаланышта булган. Аны капиталь төзекләндерү халык соравы буенча гамәлгә ашырылды. Агымдагы елга Татарстанда мәдәният учакларын төзекләндерү программасына кертелгән эш буенча биредә үзгәртеп кору ел башыннан ук башланды. - Программа нигезендә төзекләндерүгә 11 млн. сум акча республика бюджетыннан бүленде. Мәдәният йорты тышкы яктан да, эчтән дә искиткеч күркәм төс алды. Идән, тәрәзәләр, ишекләр, стеналар яңартылды. Әлеге мәдәният йортының җылыту системасы начар эшләү сәбәпле биредә салкын була иде, хәзер җылылык, канализация, электр системалары алыштырылу белән мәдәният учагы җылы, якты үзенә тартып тора торган урынга әйләнде. Ә җирле бюджеттан бүленгән 1 млн. сумга якын акчага без сәхнә өчен эленмәләр, бизәлеш булдырдык, 180 урынлык тамаша залында яңа утыргычлар урнаштырылды. Кадерлеләргә иҗатта да, тамашалар карауда да яңартылган бинаның рәхәтен күрергә язсын, - дип елмая мәдәният идарәсе башлыгы Сәрия Батыршина. Төзекләндерү эшләрен алып барган “Зәй төзелеш комбинаты” ҖЧШ хезмәткәрләре эшеннән барысы да канәгать. - Оешма директоры Николай Кириллов, прораб Ленар Солтанов һәр эшне җитди контрольдә тотып, бөтен безнең теләкләрне исәпкә алып, һәр тәкъдимгә илтифатлы булдылар, оешма хезмәткәрләре сыйфатлы төзекләндерү эшләре алып бардылар. Төзүчеләр бинаны тиз арада сафка бастыру өчен вакыт белән исәпләшеп тормады. Бу әлбәттә район җитәкчелегенең төзекләндерүнең үз вакытында башкарылуына җитди игътибар бирү нәтиҗәсе дә. Кадер җирлеген яңа мәдәният йорты белән сөендерүләре өчен без республика җитәкчелегенә дә, район хакимиятенә дә, төзүчеләргә дә бик рәхмәтле, - ди җирлек башлыгы Римма Зайцева. (фотоларны түбәннән карагыз) Энҗе Әгъләмова