Зәйдә махсус хәрби операциядә катнашучылар белән хушлаштылар

Бүген Зәй махсус хәрби операциядә катнашучылар – контракт хезмәте ефрейторы Мельников Владимир Владимирович һәм мобилизация буенча хәрби хезмәткә кергән гвардия рядовое Мишеев Константин Валерьевич белән хушлашты. Матәм чарасы "Энергетик" мәдәният йортында узды. Район башлыгы Р.Г. Кәримов һәлак булган солдатларның туганнарына һәм якыннарына кайгы уртаклашу сүзләре белән мөрәҗәгать итте. "Хөрмәтле Александр Владимирович, Наталья Константиновна, Валерий Петрович, Гөлнур Исрафил кызы, туганнар һәм якыннар! Татарстан Республикасы Рәисе Рөстәм Нургали улы Миңнеханов исеменнән, шәхсән үз исемемнән, барлык зәйлеләр исеменнән авыр югалту белән бәйле булган кайгыгызны уртаклашам. Бөтен район халкы сезнең белән бергә кайгыра. Якташларыбыз Мельников Владимир Владимирович һәм Мишеев Константин Валерьевич командование куйган бурычларны намуслы һәм җаваплы башкардылар, чын батырлык күрсәттеләр, үз Ватаннарына тугрылык һәм ныклык үрнәге булып калдылар. Алар-хәзер сафта һәм алгы сызыкта булган һәркем өчен намус һәм кыюлык үрнәге. Һәрвакыт шулай булды һәм булачак та. Без, зәйлеләр, якташларыбызның батырлыгы белән горурланабыз. Безнең бурыч-күптән көтелгән Җиңү хакына гомерләрен биреп көрәшүчеләрнең истәлегенә лаеклы булу. Безнең геройларга мәңгелек дан. Сугышчылар тыныч йокласын", - диде Разиф Галиевич. Шулай ук кайгы уртаклашу сүзләре белән, Татарстан Республикасы Хөкүмәте кураторы Иван Гущин, шәһәр һәм район хәрби комиссары Динар Хәсәнов, Сарман муниципаль районы башлыгы урынбасары Гүзәл Гәрәева чыгыш ясадылар. Владимир Владимировичны һәм Константин Валерьевичны соңгы юлга барлык хәрби хөрмәтләр белән озаттылар. Солдатларны бер минут тынлык белән искә алдылар, чәчәкләр салдылар. Владимир Мельниковны Бохарай авылы зиратына, Константин Мишеевны Якты Күл авылы зиратына җирлиләр. Ватанны саклаучыларга мәңгелек дан!