Зәйдә мәгариф оешмалары җитәкчеләренең киңәшмәсе узды
Бүген мәктәп укучыларының Кече фәннәр академиясе базасында район башлыгы Р.Г. Кәримов катнашында шәһәр һәм район мәгариф оешмалары җитәкчеләренең «2025-2026 уку елында олимпиада хәрәкәтендә катнашу нәтиҗәләре» дигән темага киңәшмәсе узды.
Сәламләү сүзе белән җыелганнарга Разиф Кәримов мөрәҗәгать итте. Ул өстәмә белем бирү учреждениеләренең балаларны укытуда һәм тәрбияләүдә, шул исәптән мәктәп укучыларының Кече Фәннәр академиясендә дә уңай роль уйнавын билгеләп үтте.
Мәгариф идарәсе җитәкчесе Миләүшә Вәлиәхмәтова әйтүенчә, олимпиадаларда шәһәр һәм район укучылары 97 урын алган - бу 11 мәктәптән 3 җиңүче һәм 94 призер. Бөтенроссия укучылар олимпиадасының төбәк этабында катнашу йомгаклары буенча Зәй укучылары 40 урын, Республика укучылар олимпиадасының йомгаклау этабында катнашу йомгаклары буенча 44 урын, «Олимпка юл» республика укучылар олимпиадасының йомгаклау этабында катнашу йомгаклары буенча 13 урын алдылар.
Кече фәннәр академиясе директоры Гүзәл Шәрәфиева учреждениенең эш тәҗрибәсе белән уртаклашты һәм эшчәнлекнең төп юнәлешләре турында сөйләде. Биредә 327 бала өстәмә белем ала: табигый-фәнни юнәлештә - 175 бала, физкультура-спорт – 95 бала, техник – 15 бала, сәнгать-эстетика – 42 бала. Дәресләр татар, инглиз телләре, әдәбият, тарих һәм хокук, математика, химия, физкультура, биология һәм геология буенча алып барыла.
Төп докладлардан соң мәгариф учреждениеләре җитәкчеләре учреждение директорының «60 секунд» интеллектуаль олимпиадасында, 6 нчы мәктәпнең инглиз теле укытучысы Алия Муллакаеваның «юллар арасында күрергә, сүзләр арасында ишетергә» мастер – классында катнаштылар, фикер алыштылар.
Нәтиҗәләр ясап, Разиф Галиевич районның педагогик бергәлегенә нәтиҗәле хезмәтләре өчен рәхмәт белдерде, уку елын уңышлы тәмамлауларын теләде.