Космосның яңа чикләрен ачабыз

15 апрельдә Р. Ш. Фардиев исемендәге гимназиядә үзенчәлекле бер мохит хөкем сөрде. Бу көнне космоска беренче кеше очуының 65 еллыгына багышланган, "Безне берләштергән көн" дип исемләнгән танып-белүле тарихи сәгать үткәрелде. 1961 елның 12 апрелендә булган бу вакыйга совет фәне һәм техникасының триумфы гына түгел, ә бөтен кешелек тарихында борылыш ноктасы булып, космосны үзләштерүнең яңа эрасын ачты. Зәй музее хезмәткәрләре гимназистлар һәм кунаклар игътибарына "Космос безнеке!" дип исемләнгән күргәзмә тәкъдим иттеләр. Күргәзмә кызыклы артефактларга бай иде, алар арасында Сергей Крикалёвның космик костюмы прототибы, авыр авиация очучысының гермошлемы, голографик вентилятор аерым урын алды. Бу экспонатлар, космоска кешенең беренче адымнары турындагы хикәяләр белән бергә, укучыларга бөек казанышлар тарихына кагылырга ярдәм итте. Чарада катнашучылар арасында Иске Тәкмәк авылында туып-үскән Чекашовлар гаиләсе дә бар иде. Алар тарихи мизгелгә – "Восток" космик корабының Зәй җиренә килеп төшүенә шаһит булганнар. Алик Нургали улына Чернушка исемле эт-космонавт килеп төшкәндә 10 яшь булган. Ул вакыттагы гомуми дулкынлану, автоматлар тоткан десантчылар, самолетлар – барысы да аның хәтерендә гомерлеккә уелып калган. Бу шәхси истәлекләр яшь тыңлаучыларга ерак һәм фантастик булып тоелган вакыйгаларның масштабын һәм әһәмиятен тоярга мөмкинлек бирде. Очрашу барышында алып баручы Юрий Гагаринның очышы турында сөйләде, аның зур әһәмиятен ассызыклады. Гагаринның очышы кешенең чиксез мөмкинлекләре символына, хәтта иң кыю хыялларның фән, тырышлык һәм үз көченә ышану аркасында тормышка аша алачагына дәлил булды.