Сармаш-Баш авылында авыл халкы белән очрашу узды

22 январь көнне Сармаш-Баш авылы мәдәният йортында район башлыгы урынбасары П.С. Уразайкин һәм шәһәр прокуроры С. А. Урванцев катнашында халык белән очрашу узды. Очрашуда шулай ук район Советы, башкарма комитет җитәкчеләре, белгечләре, шәһәр һәм район хезмәтләре һәм ведомстволары вәкилләре катнашты. Көн тәртибенә түбәндәге мәсьәләләр кертелгән иде: районның социаль-икътисади үсеш йомгаклары һәм 2026 елга бурычлар, 2025 елга авыл җирлегенең социаль-икътисади үсеш йомгаклары һәм 2026 елга бурычлар; авыл халкына дәүләт ярдәме программалары һ. б. 2025 елда авыл җирлегендә үзара салым буенча түбәндәге эшләр башкарылган: Сармаш-Баш юлларына ремонт ясалган-Үзәк урамга вак таш сибелгән һәм электр энергиясен экономияләү программасы буенча Октябрь урамындагы 6 урам яктырткычы алыштырылган. Кәдек авылында зират коймасына ремонт ясалган. Федоровка авылында Полевая урамына юл салынган һәм Күпер урамындагы 3 яктырткыч алыштырылган. Очрашу бүләкләү тантанасы белән тәмамланды. Ятьмә үргән өчен, Сармаш-Баш авылыннан бер төркем хатын-кыз Зәй муниципаль районы башлыгының Рәхмәт хаты белән бүләкләнде.