Зәйдә Ватан сакчыларын соңгы юлга озаттылар

Бүген Зәй халкы махсус хәрби операциядә катнашучылар – сержант Акдигитов Максим Васильевич һәм рядовой Колесов Дмитрий Алексеевич белән хушлашты. Матәм панихидасы шәһәр мәдәният йортында узды. Район башлыгы Р.Г. Кәримов һәлак булганнарның туганнарына һәм якыннарына кайгы уртаклашу сүзләре белән мөрәҗәгать итте. "Хөрмәтле хәрбиләрнең туганнары һәм якыннары! Татарстан Республикасы Рәисе, шәхсән үз исемемнән һәм барлык зәйлеләр исеменнән кайтарып булмаслык югалту белән бәйле кайгыгызны уртаклашам. Якын кешеңне югалтуның авыртуын сүз белән генә аңлатып булмый. Без сезнең белән бергә кайгырабыз. Бу авыр көннәрдә сезгә сабырлык һәм ныклык телим. Максим Васильевич һәм Дмитрий Алексеевич безнең хәтердә мәңгегә үз дәүләтләрен саклаучылар, чын патриотлар һәм чын геройлар булып калачаклар!"- диде Разиф Галиевич. Кайгы уртаклашу сүзләрен шулай ук хәрби комиссариатның өлкән белгеч - эксперты Георгий Борисов белдерде. Хәрбиләрне соңгы юлга барлык хәрби хөрмәтләр белән озаттылар. солдатларны бер минут тынлык белән искә алдылар, чәчәкләр салдылар. Хәрбиләрне Яңа шәһәр микрорайоны зиратына җирләделәр. Ватанны саклаучыларга мәңгелек дан!