Үзәк китапханәдә «Ватан символлары» дигән мәгълүмат сәгате узды

С.Рәфыйков исемендәге Үзәк китапханәнең татар әдәбияты бүлегендә Россия Федерациясе Конституциясе көненә багышланган «Ватан символлары» дигән мәгълүмат сәгате узды. Очрашуга "Р.Ш.Фәрдиев исемендәге Татар гимназиясе"нең 8 А сыйныф укучылары килде. Чара Конституция көненә багышланды һәм яшүсмерләрнең гражданлык юлының башлануын символлаштырды. Китапханәчеләр укучыларга бәйрәмнең тарихы, Конституциянең нәрсә икәнлеге, аның ил өчен әһәмияте, шулай ук төп канунның барлыкка килү тарихы һәм Россиянең дәүләт символикасы: гербы, флагы һәм гимны турында сөйләделәр. Алар бу көннең ни өчен барлык россиялеләр өчен мөһим булуы һәм аны ничек билгеләп үтү кабул ителгәнлеге турында фикер алыштылар. Чара барышында катнашучылар викторина сорауларына җавап бирделәр, һәм китап күргәзмәсе белән таныштылар. Мондый очрашулар үсеп килүче буынның хокукый грамоталылыгын һәм законга хөрмәтен арттырырга ярдәм итә.