Район башлыгы татар гимназиясенең 100 балл ияләрен котлады

Бүген район башлыгы Разиф Кәримов Бердәм дәүләт имтиханнарын 100 баллга тапшырган укучылар белән очрашты. Ринат Фәрдиев исемендәге татар гимназиясендә җылы да, тантаналы да мизгелләр чәй өстәле артында дустанә сөйләшү, яшьләргә олы тормыш юлына хәер-фатиха бирү белән барды. - Ринат Фәрдиев исемендәге татар гимназиясендә имтиханнарны иң югары балларга бирүче укучылар булу белән без чын күңелдән горурланабыз. Кызларга, укытучыларга, мәктәп коллективына, әти-әниләргә рәхмәттән башка сүз юк. Татар гимназиясендә заманча, яхшы шартлар тудырылу үз җимешләрен бирүе дә бик куанычлы, - диде Разиф Кәримов тәбрикләү сүзләрен җиткереп. Тантанага имтиханнарны 100 баллга тапшырган Азалия Сираҗиева һәм Алсу Әхмәтҗанова әти-әниләре, педагоглары белән килгән иделәр. Азалия химиядән 100, рус теленнән 98, биологиядән 96 балл җыеп искиткеч нәтиҗәләр күрсәтте. Аңа кадәр дә ул Бөтенроссия фән олимпиадаларының төбәк турларында күп тапкырлар призер, ә быел биологиядән җиңүче булган кыз. Азалия киләчәктә табиб булырга хыяллана. Алсу Әхмәтҗанова рус әдәбиятыннан имтиханны 100 баллга тапшырды. Ул 9 нчы сыйныфка кадәр Югары Шепкә авылы мәктәбендә укыган, ә 10-11 сыйныфларга татар гимназиясенә килгән. Киләчәктә дизайн өлкәсендә белгеч булырга хыяллана, Казан федераль университетына керергә җыена. Җылы аралашудан соң Разиф Кәримов укучы кызларга истәлекле бүләкләр тапшырды, аларның әти-әниләрен, педагогларны Рәхмәт хатлары белән бүләкләде. Марат Мөхәммәтханов җитәкчелегендәге татар гимназиясе коллективына олы рәхмәт сүзләрен җиткерде.