Зәйлеләр Бөек Ватан сугышында һәлак булганнарны искә алдылар
22 июньдә - Хәтер һәм кайгы көнендә, зәйлеләр Бөек Ватан сугышында һәлак булганнарны искә алу өчен азат итүче сугышчы һәйкәле янына җыелдылар.
Район башлыгы урынбасары Петр Уразайкин митингта катнашучыларга мөрәҗәгать итте. Ул билгеләп үткәнчә "22 июнь Ватаныбыз тарихында фаҗигале һәм ачы дата – 84 ел элек 27 млн кешенең гомерен өзгән сугыш башланды. 7 меңнән артык зәйле яу кырларында һәлак булды. Без һәрвакыт Ватанны сугышларда саклаган, тылда хезмәт батырлыклары кылган кешеләр алдында бурычлы. Бу көн сугыш кырында мәңгелеккә калганнарны, безнең белән инде булмаган ветераннарыбызны искә алу көне. Чын күңелдән барлык район халкына сәламәтлек, иминлек, игелек һәм тыныч күк йөзе телим"!-диде Петр Сергеевич үзенең чыгышында.
Митингта катнашучылар алдында шулай ук хәрби комиссариат вәкиле Александр Гурьянов, «Билал» мәчете имам - хатибы Илсур хәзрәт Әюпов чыгыш ясады.
Бер минут тынлык белән Бөек Ватан сугышы геройларын искә алдылар. Чарада катнашучылар тирән хөрмәт йөзеннән, һәлак булганнар истәлегенә азат итүче сугышчы һәйкәленә чәчәкләр салдылар.