Үзәк китапханәдә «Кече Олимпия уеннары» дип аталган спорт-сәламәтләндерү бәйрәме үткәрелде

Ел саен 23 июньдә Халыкара Олимпия көне билгеләп үтелә. Бу көнне бәйрәм итү кысаларында, 20 июнь көнне С.Рафиков исемендәге Үзәк китапханәдә 3 нче мәктәпнең мәктәп яны лагере балалары өчен «Кече Олимпия уеннары» дип аталган спорт-сәламәтләндерү бәйрәме үткәрелде. Лагерьда тәрбияләнүчеләр Олимпия уеннары тарихы турындагы белемнәрен тулыландырдылар, олимпиаданың үз символикасы булуын белделәр. Спорт, сәламәтлек һәм бердәмлек бәйрәмендә балалар аркан тартуда, кул көрәштерүдә үз көчләрен сынап карадылар, төрле спорт һәм күңелле команда эстафеталарында көч сынаштылар. Каты көрәшкә әзер булган балалар үзләренең көчләрен, җитезлекләрен, тизлекләрен, шулай ук бердәмлекләрен һәм үзара ярдәмләшүләрен күрсәттеләр. Олимпия көне күңелле, кызыклы, балаларның физик һәм акыл үсеше өчен файдалы узды.