Зәйдә төзекләндерелгән һәйкәл ачылды
23 нче майда Р.Ш. Фәрдиев исемендәге паркта (икенче чират) реконструкциядән соң “Барлык буыннар чикләренә” һәйкәлен ачу тантанасы булды. Бу көнне бирегә шәһәрнең чик буе сакчылары, аларның туганнары, якыннары, дуслары, ватандашлары һәм кунаклары җыелды. Тантанада катнашучылар бер-берсен сәламләделәр. Кунакларга һәм шәһәр халкына котлау сүзләре белән Зәй шәһәре башлыгы урынбасары Максимов Сергей Васильевич, Татарстан Республикасының «Пограничниклар берлеге» рәисе Сөләйманов Альберт Ягъфәр улы, Зәй районының «Пограничниклар берлеге» Татарстан Республикасы төбәк иҗтимагый оешмасы әгъзасы Хәсметдинов Наил Сабирҗан улы, Ветераннар советы рәисе Алексеев Алексей Васильевич мөрәҗәгать иттеләр. Соңыннан барлык катнашучылар бер минутлык тынлык белән чик буе сакчыларын искә алдылар, Ватаныбызны саклап һәлак булган солдатларның һәйкәлләренә чәчәкләр салдылар. Соңыннан кунаклар һәм шәһәр халкы алдында концерт номерлары белән «Созвездие-Йолдызлык» Республика телевизион яшьләр эстрада сәнгате фестивале җиңүчеләре, Татарстан Республикасының атказанган мәдәният хезмәткәре Вәлиуллина Әлфия Халисовна җитәкчелегендә "Мирас" вокаль ансамбле чыгыш ясадылар.