Бүген район башлыгы Разиф Кәримов эш визиты белән «Зәй шикәре»АҖендә булды
Бүген район башлыгы Разиф Кәримов эш визиты белән «Зәй шикәре»АҖендә булды. Ул «Агрокөчләр» АҖ генераль директорының шикәр заводы эшчәнлеге мәсьәләләре буенча урынбасары Александр Цветков, район башкарма комитеты җитәкчесенең икътисадый үсеш, сәнәгать, сәүдә һәм эшмәкәрлеккә ярдәм буенча урынбасары Марат Хәбибуллин белән бергә заводның җитештерү цехында булды, технологик станцияләрне йөреп чыкты. Район башлыгы шикәр кайнату сезонында тузган җайланмаларга капиталь ремонт ясауның барышы белән танышты. Разиф Кәримовның шикәр заводына визиты районда шикәр чөгендерен чәчү тәмамлануына туры килде. Катлаулы һава шартларына да карамастан, игенчеләр планны 100 процентка диярлек үтәгәннәр, техник культураның гомуми мәйданы 9585 га тәшкил итә. Чәчү технологиясе быел да төгәл эшләнгән һәм вак-төяккә кадәр исәпкә алынган. Игенчеләр табышлы елга өметләнәләр, мул уңыш көтәләр һәм югалтуларсыз урып-җыюга омтылалар. Ә бу исә, үз чиратында, шикәр заводы продукциясен җитештерү күләмнәрендә чагылыш табачак.